Psalms 22:3-21

³Bare ni King, keta laili nunguningkiri; ana Israel suen la ni nip patawusan.

⁴Nanga taleng girigir ni ko ko nongomang ningi nunguning aram, se ni memek ningi nunga sangem ale nunga giem.

⁵Nuna nikate niaman, se ni nunga sangem; nuna ni ko ko nongomang ningi nunguning aram, se ni me nunga bita tokasam, am nunga sangarukasam, ale nunga giem.

⁶Bare ani kariimet iwita mena, ani ali ko malalok iwita; kariimet suen la ani agarki maguwusan ale aga gusisan.

⁷Ale suen la agarkasan mu den kolara balsan, ale nusumulak daleluwu sapasan ale nusupuling sapa gilingisan.

⁸Ale aga manorsan, “Ni Yawe ko gemang ningi nunguning masam, bare awuk se me ka sangarso? E nu nika kueso, mu awuk se me ka sangarso?” iwita aga balu gilingisan.

⁹Bare ni keta ani ayam tuagu ningi yawarakala aga sinar taem se bilangerem; ale tom ani amin nowakasam mu ni ninguru aga sinar tokasam.

¹⁰Ani bilanga se la, ni ko ko angamang ningi nunguning aram; se ni aninga Kaem bagerem tai aitak.

¹¹Ani ikup aga iram, se ni ani me aga bitarko! Ani kariimet ito aga sangukko mena.

¹²Bulmakau diwang iwita aga taluluru gilingiman; nuna sokel ago nunguningkiri, Bashan sor ko bulmakau turan.

¹³Nuna lion iwita mel bo momonko ngang masan ale niasan iwita, aga momon maguwumonko bagasan.

¹⁴Se yu ali awote kaposo ale palenga namoso iwitata, ani asokel mena saparam; ani angimik sokel kutukutuk ma saparam. Aninga angamang motam ningi mu candle iwita kaniram ale palengam kaposo.

¹⁵Ani adogotak garagara mam, ale angamili tarigi gek mam; ni ani kuerikko aga beterem, se ani kuesam.

¹⁶Kausik memek aga taluluru guruguman iwita, kari memek aga taluluru guruguman. Nuna aga asiwik agiting usi barukuman.

¹⁷Se aninga angimik sokel suen la mu ani ko ikiwasam; kariimet ani agarkasan ale “terong memek tam” ma balsan.

¹⁸Nuna aninga angimik guang kututuwu giman ale pagaru nunumi tuman; ale aga guang bo kolamon ale awiriya taukko mu ko kola gilingiman.

¹⁹Bare Yawe, ni awar biya me bagerko! Ni aninga Saonga Kari, tairatela tair ale aga sangaruko!

²⁰Batir kore ningi aga sangaru toko! Kausik nogore ningi ni aga sangaru toko!

²¹Lion nuguring ningi aga bataguru toko! Bulmakau daong memek mu ko aga sangaru toko!