Psalms 145:1-16

¹Got rog ma pilung rog, bay ug weliy rogon feni sorom ngan nang; bay ug pining e magaer ngom ndariy n’umngin nap’an.

²Gubin e rran ni bay ug pining e magaer ngom; bay ug pining e sorok ngom ndariy n’umngin nap’an.

³I SOMOL e ba sorok, ma ri lr e thingar ni pining e sorok ngak; rogon feni sorok e dabi taw e leam ngay.

⁴Tin ni kam rin’ e bay ni pining e sorok riy ngom u reb e mfen ngu reb; bay ur weliyed ngan nang e pin’en nib sorom ni kam ngongliy.

⁵Girdi’ e bay ur weliyed murung’agen e fla’ab rom nge rogon feni sorom, ma bay ug leamnag e pin’en nrib fel’ ni kam ngongliy.

⁶Ma girdi’ e bay ur weliyed e pin’en nib sorom ni kam ngongliy, ma bay ug weliy rogon feni sorom ngan nang.

⁷Bay ur weliyed murung’agen fanam fel’, miyad tangnag murung’agem nri gab gol.

⁸I SOMOL e ba t’uf e girdi’ rok mma runguyrad, ba sowath ni nge damumuw ma ba sug ko t’ufeg ni dabimus.

⁹Bfel’ e tin ma rin’ ngak urngin e girdi’, mma runguy urngin e tin ke sunumeg.

¹⁰SOMOL, urngin e tin kam sunumeg e bay ur pininged e sorok ngom, ma tirom e girdi’ e bay ur pininged e magaer ngom!

¹¹Bay ur weliyed murung’agen e fla’ab ko gagiyeg rom, miyad weliy murung’agen gelngim ni bay nib gel,

¹²ya nge nang urngin e girdi’ feni sorom ko tin kam rin’, nge gagiyeg ni ga be tay.

¹³Gagiyeg rom e bayi par ndariy n’umngin nap’an, ma bay um par ni gur e pilung ndariy n’umngin nap’an. I SOMOL e ba yul’yul’ ko tin keyog nra rin’, ma bfel’ urngin e tin ma rin’.

¹⁴Ma ayuweg urngin e pi’in ke yib e gafgow ngorad; ma pi’ e athamgil nga laniyan’ e pi’in ke mulan’rad.

¹⁵Urngin e tin nib fos ban’en ni yad be toer ngak, mma pi’ e ggan ngorad ko ngiyal’ ni nge yog ngorad.

¹⁶Ba gaman urngin ni be pi’ ngorad nge yan i aw ni kefel’ u wun’rad ni yad gubin e tin ke yag ngorad.