Psalms 144:4-15

⁴Ana ali kariimet mu marir pus maso ale mena namoso iwita; anananga marak bagara ko tom mu tamarum iwita, tom tukunangta baga mena namoso iwitatala.

⁵O Yawe, ni taiti gomang kaguru ale tai kaparko; duruk nunga kau to se tama bur barasukko.

⁶Pure nikim bitar se kaparuk se kager kari memek nunga parusuwurko; nika gatu mare te nunga karo se nagumonko.

⁷Kualala kiting garuku se tai kaparuk se aninga bataguru to ale aga sangaruko; yu lom bibiya ewere ningi se, sor iwareng ko kariimet nuguting te aga bataguru toko.

⁸Nononga nuguring mu den kawel ago terong mam, se nunga nungamili mu guruga patawura karogo tala.

⁹O Kaem, ani wur bo iru ilu kisekko; ani aga gita kolarik ale wur ilu kisekko.

¹⁰Ni king nunga sangorsam se nuna kager te marirasan ko Kaem; se ani nika ura kari David, baenat kore memek wore ningi aga bataguru taem.

¹¹Buta se sor iwareng ko kari nuguting te aga bataguru to ale aga sangaruko! Nononga nuguring mu den kawel ago terong mam, se nunga nungamili mu guruga patawura karogo tala.

¹²Nanga sangaru se anananga kuriang kari nunga kulak te la mu, tam bisek ali welang te aragoso iwita aragamonko; se nanga nanawusari mu, king ko kawam biya ko ngatalek bibiya kiwol karogo aora biya iwita bagamonko.

¹³Nanga ningam mu inang duap duap karogo terong ma saparukko; se nanga sipsip mu kuriang ninguru ilumon se kaparuk ale ninguru sor to saparukko;

¹⁴se nanga bulmakau mu, suen la kuriang nutagu ningi karogo yukuwa sapamonko. Se udagi kager memek por kuluka ale utu nagura mu menaruk, se nanga talipara ale sor iwareng te nangarak namara mu bo ago me aniruk, se wonong tuagu ningi yaman ko niara kikira mu mena namarukko.

¹⁵Kariimet marak uwuta nungumik te kaposo mu amilmilamonko; kariimet awiriya Yawe mu nononga Kaem, mu amilmilamonko.