Psalmaro 68:25-35

²⁵Antaŭe iris kantistoj, poste kordinstrumentistoj, En la mezo de knabinoj tamburinistinoj.

²⁶En la kunvenoj gloru Dion, mian Sinjoron, Vi, devenantoj de Izrael.

²⁷Tie estas Benjamen, la plej juna, ilia reganto; La princoj de Jehuda kaj iliaj amasoj; La princoj de Zebulun kaj de Naftali.

²⁸Via Dio destinis vian forton. Fortikigu, ho Dio, tion, kion Vi faris por ni.

²⁹Pro Via templo en Jerusalem La reĝoj alportos al Vi donacojn.

³⁰Kvietigu la beston en la kanoj, La aron da bovoj kun la bovidoj, Popoloj, kiuj humiliĝas pro pecoj da arĝento. Li dispelas la popolojn, kiuj deziras batalojn.

³¹Venos eminentuloj el Egiptujo; Etiopujo rapidos, por etendi siajn manojn al Dio.

³²Regnoj de la tero, kantu al Dio, Muziku al mia Sinjoro, Sela.

³³Kiu regas en la ĉielo de la eternaj ĉieloj. Jen Li tondras per Sia voĉo, forta voĉo.

³⁴Gloru la forton de Dio! Super Izrael estas Lia majesto, Kaj Lia potenco estas en la nuboj.

³⁵Timinda Vi estas, ho Dio, en Via sanktejo. Li estas la Dio de Izrael, Li donas forton kaj potencon al la popolo. Glorata estu Dio.