Psalm 89:3-46

³I inauki onger, ai pilipildar akan; I kauki onger Dawid nai ladu:

⁴Kadaudok om pan mimieta kokolata, o I pan kauada mol om sang eu kainok lel eu. Sela.

⁵Nanlang ap kapinga omui manaman akan, Maing Ieowa, o omui melel nan pokon en sapwilim omui saraui kan.

⁶Pwe is nan tapok kan me rasong Ieowa? De is me rasong Ieowa nan pung en me lapalap akan?

⁷Kot meid manaman nan pokon en me saraui kan, o meid kapuriamui ong me kaukauson re a.

⁸Maing Ieowa, Kot Sepaot, is me rasong komui. Omui melel kin kapil komui pena.

⁹Komui me kotin kaunda madau angiang. Komui kin kamoleilei iluk kan ni ar pan kokoda.

¹⁰Komui me kotin tiakedi Raap dueta kamelar amen. Kom kotin kamueit pasanger imwintiti kan ki lim omui manaman.

¹¹Lang o sappa me sapwilim omui, sappa o audepa. Komui me kotin pasonedier.

¹²Komui me kotin wiadar pali apong o pali air, Tapor o Ermon kin ngisingiski mar omui.

¹³Lim omui me mananan o kumut en lim omui me roson, lim omui pali maun me ileile.

¹⁴Melel o pung iei pason en mol omui; kalangan o melel kin tiong mo omui.

¹⁵Meid pai aramas kan, me asa ngisingis! Ieowa, re pan weweid ni marain en silang omui.

¹⁶Re kin polauleki mar omui sang ni mansang lel sautik, o re kin pwai kida omui pung.

¹⁷Pwe lingan en ar kelail komui, o komui pan pokada os at.

¹⁸Pwe Ieowa pere patail o me Saraui en Israel, i atail Nanmarki.

¹⁹Mas o kom kotin masanier ki kasansal kai ong me lelapok kan: I kamanadar me Lapalap amen, I kasapwiladar pilipildar amen sang ren aramas akan.

²⁰I diaradar ai ladu Dawid, I keiekidier i ai le saraui.

²¹Pa i pan kolekol i, o pa i pan kamanada i ansau karos.

²²Imwintiti kan sota pan kak widing ong i, o me sapung kan sota pan kak kaloedi.

²³I pan kamela me palian i mo a, o I pan kaloke ir, me kailongki i.

²⁴A ai melel o kalangan pan mi re a, o ni mar ai os a pan pokapokada.

²⁵I pan ki ong pa a, en kaunda madau, o pa a maun, en kaunda pil akan.

²⁶A pan likwir dong ia: Komui Sam ai, ai Kot, o paip en maur i.

²⁷O I pan wia kila i nai meseni, ileila sang nanmarki en sappa kan.

²⁸I pan kalangan ong i kokolata, o ai inau ong i pan duedueta.

²⁹I pan ki ong i kadaudok a kokolata, o mol a pan warai dueta lang.

³⁰A ma na kan pan muei sang ai kapung, o re sota pan weweid ni ai kusoned akan,

³¹Ma re pan kasaminela ai tiak kan, o sota peiki ong ai kusoned akan,

³²I ap pan kaloke kin ir ar katiwo ki sokon pot, o pan woki ir, pweki ar sapung.

³³A I sota pan kiwei sang i ai mak, o ai melel pan mimieta re a.

³⁴I sota pan kawela ai inau, o I sota pan kawukila, me kowei sang nan au ai.

³⁵I kaukilar ai saraui pan me pak, me I sota pan likam ong Dawid:

³⁶Kadaudok a pan soutuk, o mol a dueta katipin mo i.

³⁷A pan duedueta dueta saunipong; o saunkadede nan tapok kan me melel. Sela.

³⁸A met komui kasapokela o ongiongi sapwilim omui me keidier.

³⁹Kom kotin kasela inau en omui ladu, o kom kotin kasaminela mar a.

⁴⁰Kom kotin karongk pasang a kel akan karos, o kawelar a im tengeteng kan.

⁴¹Karos me daulier wasa o kulia sanger; a wialar kankaurur ong men imp a kan.

⁴²Kom kotin pokada pali maun en me palian i, o kaperendar a imwintiti kan karos.

⁴³Kom pil kotiki sanger mana en a kodlas kong, o sota kapwaiada i ni pei.

⁴⁴Kom kotin kaimwisokalar a lingan, o kasedi ong nan pwel mol a.

⁴⁵Kom kamotomotala ran en a manakap, o kadupalekidi i namenok. Sela.

⁴⁶Arai da, Maing Ieowa, me kom pan kotin karirela pein komui; arai da omui ongiong pan lulada dueta kisiniai?