Psalm 89:27-50

²⁷Nga fah oayapa oru tuh elan wounse mukul nutik, El pa fulat liki tokosra nukewa.

²⁸Nga fah karingin wuleang luk nu sel, Ac wulela luk fah welul nwe tok.

²⁹Tokosrai lal ac fah oakwuki ku oana kusrao. Sie sin mwet in fwil natul ac fah tokosra in pacl nukewa.

³⁰“Tusruktu, mwet in fwil natul fin tia akos ma sap luk, Ac tia moul fal nu ke oakwuk luk,

³¹Elos fin seakos mwe luti luk Ac tia karingin ma sap luk,

³²Na nga ac fah srunglulos ke sripen ma koluk lalos; Nga ac fah akkeokyalos ke ma sutuu lalos.

³³Tusruktu, lungse luk nu sel David ac fah tia tui, Oayapa nga fah tia mulkunla wulela luk nu sel.

³⁴Nga ac fah tiana kunausla wulela inmasrlok el, Ku sisla siefanna ma nga tuh wuleang nu sel.

³⁵“Wulela sefanna nga fah orala ke Inek: Nga fah tiana kikiap nu sel David.

³⁶Ac fah oasr na fwil natul, Ac nga fah karingin tokosrai lal ke lusenna pacl faht uh kalem.

³⁷Ac fah sie ma oakwuk oana malem uh Su liye ma nukewa inkusrao me.”

³⁸Tuh pa inge kom kasrkusrak sin tokosra su kom sulela; Kom fahsr lukel ac sisella.

³⁹Kom kunausla wulela lom nu sin mwet kulansap lom Ac sisla tefuro lal nu infohk uh.

⁴⁰Kom kunausya kalkal in siti sel Ac filiya pot ku lal in musalsalu.

⁴¹Elos nukewa su fahsr we, elos pisre ma lal, Ac mwet tulan lal nukewa elos isrunul.

⁴²Kom sang kutangla nu sin mwet lokoalok lal; Kom oru tuh elos nukewa in engan.

⁴³Kom oru tuh in wangin sripen mwe mweun natul, Ac kom lela in kutangyukla el ke mweun uh.

⁴⁴Kom eisla scepter lal lukel Ac ikruiya tron lal nu infohk uh.

⁴⁵Kom oru tuh elan matuoh meet liki pacl fal lal, Ac afinilya ke mwekin.

⁴⁶O LEUM GOD, ya kom fah wikinkomla nwe tok? Putaka mulat lom uh fah firir oana sie e?

⁴⁷Esam lah moul luk arulana fototo, Esam lah kom orekutla, moul lasr in sukawil.

⁴⁸Su ku in moul ac tia misa? Mea mwet uh ku in oru in kaingkunla kulyuk uh?

⁴⁹Leum, ku pia akpwayeyen lungse lom su kom akkalemye meet ah? Pia wulela kom tuh oru nu sel David?

⁵⁰Nik kom mulkunla lah akkolukyeyuk nga, mwet kulansap lom, Ac nga muteng kas in selnga nukewa lun mwet pegan nu sik.