Psalm 7:2-10

²Pwe ren der dueta laien amen kol ia di o tapeng ia pasang, pwe sota pil amen saundor.

³Maing, ai Kot, ma i wiadar mepukat, o ma pa i kat wiadar sapung,

⁴O ma i depukki mesued en akai ar wiawia mau ong ia, pwe i dorelar, me imwintiti ong ia, ap sota karepa,

⁵A ma so due, ai imwintiti en kaloke ia, o kol ia di, o tiakedi maur i nani pwel, o kawela mar ai. Sela.

⁶Maing, kom kotida ni omui ongiong o kotin palian makar en ai imwintiti kan, o kotin opadang ia, pwe re kotin inau kidar kapung,

⁷Pwe wei kan pan pokon dong ir; o re kotin purodala pweki irail.

⁸Ieowa iei saunkapung en wei kan. Maing, kotin sauasa ia, duen ai pung o duen ai lelapok!

⁹Re kotin kadukiedi mesued en me doo sang Kot akan, ap kotin katengedi me pung kan. Pwe komui Kot pung, kin kotin kasaui mongiong o mudilik kan.

¹⁰Kot iei pere pa i, me kin kotin sauasa me melel ni mongiong arail.