Psalm 78:2-35

²I pan ki pasang au ai, pwen padak, o pan kida kasoi en mas o,

³Me kitail rongadar o asaer, o sam atail kasoi ong kitail er,

⁴Pwe kitail ender karirila sang kadaudok arail, me pan pwarado mur, o kaparokki wau en Ieowa, o a manaman o a dodok kapuriamui kan.

⁵Pwe a kotin kauada men kataman eu ren Iakop, o kotikida kapung eu ren men Israel, me a kotin kakaliki ong sam atail akan, pwe ren uselang nair seri kan,

⁶Pwe di en mur en asa due, o seri ko, me pan ipwidi; o ni ar kokoda, ren pil kasoi ong nair seri kan,

⁷Pwe irail en kaporoporeki Kot, o ren der monokela en Kot a wiawia kan, o ren kapwaiada a kusoned akan,

⁸O ren der dueta sam arail akan, me kainok kangudi o katiwo eu, me mongiong arail sota tengeteng, o ngen arail sota melel ong Kot;

⁹Dueta kainok Epraim, me wa tatan mauin, ap purela sang nan pei.

¹⁰Irail sota dadaurata inau en Kot, o re sota men weweideki duen a kusoned akan;

¹¹O re monokelar a wiawia kan o a manaman akan, me a kotin kasansale ong irail er.

¹²A kotin wiadar manaman akai sansal mon sam arail akan nan Äkipten, nan sap Soan.

¹³A kotin palang pasang madau o kotin mueid ong ir, en kotela, o wiadar pil dueta kel takai eu.

¹⁴A kotin kalua kin irail tapok ni ran o, a ni pong umpul en kisiniai.

¹⁵A kotin palang pasang paip nan sap tan o kanim pile kin irail pil toto.

¹⁶O a kotin kapkapwile wei pilap kai sang nan paip, pwe ren pwile wei dueta pilap laud akan.

¹⁷Ari so, re dadaurata ni arail dipi ong i, o re kaongiongi me Lapalap o nan sap tan.

¹⁸O re kasongesong Kot nan mongiong arail, ni ar inong iong kan arail manga.

¹⁹O re palian Kot ni ar inda: Melel Kot pan kak wiada tepel eu nan sap tan?

²⁰Kilang, a poki paip o, pwe pil en pwarado o pilap akan pwilepwile wei, a iaduen, a pan kak kida prot o uduk ong na aramas akan?

²¹Ieowa lao mangier mepukat, ap kotin ongiongadar, o kisiniai wiauier ren Iakop, o ongiong lel ong Israel,

²²Pweki ar so kamelele Kot, o sota kaporoporeki a sauas.

²³A ap kotin masani ong tapok en poa kan, o ritingida wanim en lang akan.

²⁴O kotin kamoredi ong ir manga, pwe ren manga, o a kotiki ong ir prot en lang.

²⁵Irail kangalar prot en tounlang kan; a kotin kadar ong ir kisin manga toto.

²⁶A kotin kapwaredar pan lang ang en mas en lang, o ni a manaman a kotin kamokidada ang en pali air.

²⁷O a kotin kamoredi ong ir uduk dueta pwel par, o manpir dueta pik en oror.

²⁸O a kotin kapup irail di wasa karos, me irail kauson ia.

²⁹Rap mangamanga o medilar kaualap, o a kotin mueid ong ir ar inong.

³⁰A ni ar kapwaiadar ar inong, o ni ar mangamanga,

³¹Ongiong en Kot ap lel ong irail er, o kamelar ol lapalap re ’rail, o kotin wokiedi manakap en Israel kasampwal akan.

³²A re kalaudelar arail dip, o re sota kamelele a manaman akan.

³³I me a kotin mueideki ren mela, re sota paida, o ar apwal akan me toto arain ar maur.

³⁴Ni a kotin kame irail la, rap idok i, o wukila, o rapaki Kot.

³⁵O re tamandar, me Kot kele parail o Kot lapalap ar saundor.