Psalm 69:11-35

¹¹Nga nokomang nuknuk in asor Ac elos isrunyu.

¹²Elos sramsramkinyu inkanek uh, Ac mwet sruhi elos kinala on keik.

¹³A funu nga, LEUM GOD, nga ac pre nu sum; Topukyu, O God, in pacl kom sulela, Topukyu ke lungse yohk lom, Ke sripen kom akpwayeye wulela lom in molela.

¹⁴Moliyula tuh nga in tia tili yen furarrar, Langoeyula liki mwet lokoalok luk, Ac liki inkof loal.

¹⁵Tia lela sronot in afinyula, Nikmet lela nga in walomla yen loal Ku tili nu in kulyuk.

¹⁶Topukyu, O LEUM GOD, ke wolana lun lungse kawil lom; Ke pakoten lom, kom in forma nu sik.

¹⁷Nikmet okanla motom liki mwet kulansap lom, Nga muta in ongoiya lulap — topukyu inge!

¹⁸Kaluku nu yuruk ac moliyula. Moliyula liki mwet lokoalok luk.

¹⁹Kom etu lupan kas koluk lun mwet uh keik, Ac lupan akmwekin ac aklusrongten orek nu sik. Kom liye mwet lokoalok luk nukewa.

²⁰Kas in akkoluk lalos kunausla insiuk, Ac nga muta in ongoiya. Nga finsrak mu ac oasr pakomuta nu sik, tuh pa wangin, Nga nunku mu ac oasr mwet tuku akwoyeyu, a wangin.

²¹Ke nga masrinsral, elos se pwasin, Ac ke nga malu, elos se vinegar nimuk.

²²Lela tepu lalos in ekla mwe kwasrip nu selos; Lela kufwa mutal lalos in mwe lusla nu selos.

²³Oru tuh mutalos in kunla, Ac oru tuh fintokolos in munas pacl e nukewa.

²⁴Okoaung mulat lom nu faclos; Ac lela kasrkusrak lom in ukwalos ac sruokolosi.

²⁵Lela iwen aktuktuk lalos in pisala, Ac in wangin mwet moul lula in lohm nuknuk selos.

²⁶Elos kalyaelos su kom kai, Ac elos kaskas ke keok lun mwet su kom kanteya.

²⁷Kom in simusla ma koluk lalos nukewa, Ac tia lela elos in wi eis molela sum.

²⁸Lela tuh inelos in iyukla liki book in moul, Ac lela elos in tia wi sikyak inmasrlon mwet suwoswos lom.

²⁹A nga muta in keok ac ongoiya, Srukyuyak, O God, ac moliyula!

³⁰Nga ac fah kaksakin God ke soko on; Nga ac fah akkalemye fulat lal ke nga sang kulo nu sel.

³¹Ma inge mwe akinsewowoye LEUM GOD, yohk liki in kisakin cow, Aok, yohk liki kisakin cow mukul ma matula ac oasr koac kac.

³²Ke mwet su muta in ongoiya elos ac liye ma inge, elos ac engan; Ac fah mwe akkeye insien mwet su alu nu sin God.

³³LEUM GOD El porongalos su muta in enenu Ac El tia mulkunulosla su muta in presin.

³⁴Kaksakin God, kusrao ac faclu, Meoa ac ma nukewa loac.

³⁵Tuh God El fah molela Jerusalem Ac sifil musaeak siti in Judah. Mwet lun God elos ac fah muta we, ac acn we ac fah ma lalos.