Psalm 68:10-30

¹⁰Pwe sapwilim omui pwin diar wasa, me a kak kotikot ia. Maing Kot, kom kotin apwalilar me luet akan duen omui kalangan.

¹¹Ieowa kotikidier a masan ki pwin en wanporon kalaimun akan.

¹²Nanmarki en karis toto tang wei madang, o waun im akan nek pasanger, me re atia sang ar imwintiti kan.

¹³Ni omail kairu nan pung en noumail pwin man akan, komail rasong pa en muroi men, me lingan dueta silper o pa a kan dueta kold lingan.

¹⁴Ma me Manaman o lao kotin kamueit pasang nanmarki kan, nana Salmon rotorot ap pan marainla.

¹⁵Nana Pasan iei nana en Kot; Pasan nana kalaimun eu.

¹⁶Menda komail nana kalaimun akan kin kilekilang ap peirin ong nana, me Kot kotin piladar en kotikot ia? O Ieowa pan kotikot wasa o kokolata.

¹⁷War en Kot me kid toto pan pak kid; Ieowa kotikot re ’rail ni nana Sinai.

¹⁸Komui kotidalang poa o saliedier me salidi kan, o kom kotin ale ong aramas pai kan, pil ong ir me katiwo kan, pwe Ieowa en kotikot wasa o.

¹⁹Kapinga Ieowa nin ran akan karos; Kot kin kotiki ong kitail katoutou patail, ap pil kotin sauasa kitail. Sela.

²⁰Atail Kot iei sauas patail, o Ieowa Kaun kin kotin dorela sang mela.

²¹Melel, Kot pan kotin kawela mongan a imwintiti kan, o a pan kotin leser pasang takain mongan ir, me dadaurata ar katiwo.

²²Ieowa kotin masanier: I pan kapure dong ir sang nan Pasan, I pan wa ir do sang nan kapin madau;

²³Pwe koe en tiakedi ong nan ntan imwintiti kan, o noum kidi kan en tamotamo.

²⁴Maing Kot, a sansal duen omui kotikot sili, duen omui kotikot sili nan mol omui saraui, ai Kot o ai Nanmarki.

²⁵Pwin en kaul kin tiong, ap pwin en saunkasang nan pung en peinakap akan, me wiadar aip.

²⁶Kapinga Kot Ieowa nan momodisou kan, komail me kisan parer en Israel.

²⁷Peniamin tikitik kin kakaun nan pung ar, saupeidi en Iuda iangaki sapwilim ar akan toto, saupeidi en Sepulon, o saupeidi en Naptali.

²⁸Omail Kot kotin kauadar omail wei; Maing Kot, i me komui en kotin katengetengedi, pwe sapwilim omui dodok.

²⁹Nanmarki kan pan wa dong uk ar kisakis pweki omail im en kaudok nan Ierusalem.

³⁰Kom kotin lipor ong man en nan rau, o pwin kau ol iangaki na kan, o wei kan, me kin pepei pweki kisin moni. Kotin kamueit pasang wek kan, me kin men mauin.