Psalm 55:3-22

³Nga arulana sangeng ke kas in aksangeng lun mwet lokoalok luk; Nga keok ke mwet koluk uh akfosrngayeyu. Elos use mwe ongoiya nu fuk; Elos srungayu ac kasrkusrak sik.

⁴Nga arulana sangeng, Ac mwe fosrnga lun misa toanyuwi.

⁵Nga arulana sangeng ac rarrar; Nga tuninfong na pwaye.

⁶Nga ke tuh in oasr posohksok keik oana wule. Nga lukun sohkla ac suk nien mongla.

⁷Nga lukun sohkla nu yen loesla Ac oru nien muta luk yen mwesis.

⁸Nga lukun sulaklak ac konauk nien wikla luk Liki eng upa ac paka.

⁹O Leum, akfohsyauk sramsram lun mwet lokoalok luk! Nga liye mwet uh oru ma sulallal ac alein yohk in siti uh —

¹⁰Raunela ke len ac fong. Ma koluk lulap ac mwe lokoalok oasr yen nukewa in siti sac.

¹¹Oasr ma musalla in acn nukewa; Inkanek uh sessesla ke mwe akkeok ac ma kikiap.

¹²Fin mwet lokoalok se luk pa aksruksrukyeyu, Nga ac ku in muteng; Fin mwet lainyu se pa tungak nu sik uh, Nga ac ku in wikla lukel.

¹³Tuh pa kom pa oru — mwet na wiuk se, Mwet na nga etu se, ac kawuk na wowo luk.

¹⁴Kut arulana sukosok in sramsram nu sin sie sin sie Ac kut tukeni alu in Tempul.

¹⁵Finsrak tuh mwet lokoalok luk in misa meet liki pacl fal lalos; Finsrak elos in moulna som nu infulan misa! Tuh ma koluk oasr in lohm selos ac insialos.

¹⁶A funu nga, nga pang nu sin LEUM GOD in suk kasru, Ac El ac fah moliyula.

¹⁷Ke lotutang, infulwen len, ac eku Pusren torkaskas ac sasao luk sowak nu yorol Ac El ac lohng pusrek.

¹⁸El ac fah moliyula ac folokinyume Liki mweun su nga oasr kac Ke nga lain mwet lokoalok puspis luk.

¹⁹God, su nuna leum ke mutawauk me, El ac fah lohngyu ac kutangla mwet lokoalok luk, Mweyen elos srangesr ekulla ouiyen moul lalos, Ac elos tia sangeng sel.

²⁰Mwet se ma kasreyu meet, el forla lain mwet kawuk lal; Ac el kunausla wulela lal.

²¹Meet, sramsram lal fwel oana kiris, Tusruktu yohk srunga insial; Kas lal musresre oana kaki in akmusra, Tusruktu fakfuk oana cutlass.

²²Filiya mwe fosrnga lom yurin LEUM GOD, Ac El ac fah loangekom; Tuh El tiana lela mwet suwoswos in kutangyukla.