Psalm 48:3-11

³God kahyo kunmekbe bu bininj kabenngehke, warridj nungka kabenmarnedjurruddi nawu bininj nuye ba bu kamak rowk kabirrihni.

⁴Nawu kings birriwern birrimornnamerrinj bu yimankek kabirrirurrkbakke kore Zion.

⁵Dja kaluk bu birribolknang, wanjh birrikangebarrhmeng, dja birrikeleminj duninjh, wanjh birrikelerlobmerrinj.

⁶Bedda birrikukdeldelmeng duninjh, dja kundjak benkarrmeng yiman kayime daluk ngalbu kadjakbekkan kore darnkih kayawmang.

⁷Dja ngudda nawu God yibenbularrbom yiman kayime kunmayorrkkimuk bu kamre koyekbeh dja kahdjerrknadjerrkname nawern kabbala nawu Tarshishbeh.

⁸Ngad ngarriwobekkang kore God kurduyimeng, dja wanjh bolkkime ngarrinang kore kunred kururrkwern nuye Yawey nawu Narrulkarrekimuk Duninjh, nawu God kadberre. God wanjh kabolknahnan kumekbe munguyh munguyh ba bu kamak rowk.

⁹O God, ngad ngarridi kore manrurrkdjamun manbu Temple ke, dja kumekbe ngarridjalburrbun bu ngudda kanmarnedjare munguyh munguyh.

¹⁰Nawu bininj nawarlahkenh kondah kurorre ngundingeyburlume dja wanjh ngundiburluburlume kore djarreh kubolkbubuyika rowk. Ngudda yikurduyime djal kunmakkenh kunbidkukunwi ke.

¹¹Kunmekbekenh kunu bininj nawu birrikang kuwarddekimuk Zion wanjh kabirrimarrmarr kore ngudda. Warridj ngudda God wanjh yidjaddjadme kundjalmak dorrengh, wanjh bininj nawu Judah benkebmawahmeng ngundimarnenjilngmakmen kore kabirriyo kuredbubuyika bedberre.