Psalm 44:1-17

¹Psalm lun Tulik natul Korah O God, kut tuh lohng ke insresr sifacna Ma mwet matu lasr elos fahk nu sesr Ke orekma yohk su kom oru nu selos in pacl lalos Ke pacl loeloes somla:

²Ke kom sifacna lusla mwet koluk liki facl selos Ac oakiya mwet lom in acn selos; Ac ke kom kai pac mutunfacl saya Ac oru tuh mutunfacl lom in kapkapak.

³Mwet lom elos tia sruokya acn inge ke cutlass natulos, Elos tia kutangla ke ku lalos sifacna, A ke ku lulap lom, Ac ke kom welulos. Ma inge akkalemye lah kom lungse elos.

⁴Kom tokosra luk ac God luk; Kom sang kutangla nu sin mwet lom,

⁵Ac ke ku lom kut kutangla mwet lokoalok lasr.

⁶Nga tia lulalfongi ke mwe pisr nutik Ku ke cutlass nutik in moliyula.

⁷A kom pa molikutla liki mwet lokoalok lasr Ac kutangulosla su srungakut.

⁸Kut ac fah kaksakin kom pacl e nukewa Ac sot kulo nu sum nwe tok ma pahtpat.

⁹Tuh pa inge kom siskutla ac lela tuh in kutangyukla kut; Kom tia sifil wi mwet mweun lasr fahsr nu ke mweun.

¹⁰Kom tuh oru kut kaingkin mwet lokoalok lasr, Na elos eisla ma lasr tuh in ma lalos.

¹¹Ac kom lela tuh in anwuki kut oana sheep; Kom akfahsryekutelik in facl sin mwetsac.

¹²Kom kukakunla mwet lom ke moul na srik Oana elos in ma na pilasr.

¹³Ke mwet tulan lasr liye ma kom oru nu sesr inge, Elos aksruksrukye kut ac isrun kut.

¹⁴Kom orekut in mwe tafunkas inmasrlon mutanfahl uh; Ac mwet uh usruk sifalos kacsr in aksruksrukye kut.

¹⁵Akpusiselyeyuk nga pacl nukewa; Ac arulana yohk mwekin luk

¹⁶Ke nga lohng pusren aksruksruk ac kas in akkoluk Lun mwet lokoalok luk, su srungayu.

¹⁷Ma inge nukewa sikyak nu sesr Kut finne tiana mulkinkomla Ku kunausla wulela su kom oakiya inmasrlosr ac kom.