Psalm 3:2-8

²Tjana kunyu anaṟa wangkapai ngayunyatjara alatji, “Godalu palunya wankaṟunkunytja wiya alatjiṯu.”

³Palu Mayatja, nyuntun ngayunya kuṯitji puṟunytju anga-kanyilpai. Munuṉin ngayunya witulyankupai tjananya pungkula waintarinytjaku, munuṉin rapa ngaṟanytjaku palyalpai.

⁴Panya ngayulu nyuntula ulara tjapilpai wankaṟunkunytjaku, ka nyuntu mulapaṯu ngayunya puḻi miḻmiḻṯanguṟu alpamilalpai ngura pala Tjayantanguṟu.

⁵Mayatja, nyuntu panyan ngayunya aṯunymaṟa kanyilpai, kaṉa mungangka wiṟuṟa kunkunaripai munuṉa mungawinki wankaringkula pukuḻpa pakalpai.

⁶Ngayuku mirpaṉtju mungilyingkuṉiya para-angatjuṟa waṉaṟa pikangku wataparaṉi. Palu ngayulu tjanampa nguḻuringkunytja wiya rapa alatjiṯu ngaṟanyi.

⁷Mayatja God, pitjalaṉitju wankaṟunama! Munu ngayuku nyanga mirpaṉtju tjuṯa kaṯiṯi pungkula minya-minyanma.

⁸Mayatja, nyuntu panya nyuntumpa walytja tjuṯa wankaṟu kanyilpai. Wanyu tjananya mukulyangku pukuḻmanama.