Psalm 38:4-21

⁴Nga walomla in sronot lun ma koluk luk, Su arulana toasr nu sik in us.

⁵Kinet keik pusrosr ac kulawi Ke sripen ma lalfon nga oru.

⁶Nga itungyuki ac kuruweni; Nga mwemelil ke len fon.

⁷Arulana folla monuk ke mas luk Ac nga apkuran in misa.

⁸Nga totola ac arulana itungyuki; Insiuk keok na, ac nga sasaola ke ngal luk.

⁹O Leum, kom etu lah mea nga kena kac; Kom lohng sasao luk nukewa.

¹⁰Insiuk kihmkim, ku luk wanginla, Ac mutuk ohkla.

¹¹Mwet kawuk ac mwet tulan luk elos tila tuku apkuran nu yuruk Ke sripen ruf keik; Finne sou luk, elos tila fahsriyu.

¹²Elos su suk in uniyuwi elos filiya kwasrip nu sik, Ac elos su kena akngalyeyu elos fahk mu elos ac kunausyula. Elos tiana tui in orek pwapa koluk lainyu.

¹³Nga oana sie mwet sulohngkas — nga tia ku in lohng, Nga oana sie mwet kofla kaskas, na nga tia kaskas.

¹⁴Nga oana mwet se su tia ku in topuk ma uh Ke sripen el tia ku in lohng.

¹⁵Tusruktu nga lulalfongi in kom, O LEUM GOD, Kom, Leum God luk, fah topukyu.

¹⁶Nikmet lela mwet lokoalok luk in engan ke nga sun mwe ongoiya; Nikmet lela elos in tungak ke nga ikori.

¹⁷Nga apkuran in ikori, Ac nga waiok pacl e nukewa.

¹⁸Nga fahkak ma koluk luk; Tuh ma inge oru nga arulana fosrnga.

¹⁹Mwet lokoalok luk elos arulana ku in mano; Pukanten mwet srungayu ke wangin sripa.

²⁰Elos su folokin ma koluk ke ma wo Elos lainyu mweyen nga srike in oru ma suwohs.

²¹Nikmet sisyula, O LEUM GOD; Nikmet fahsr likiyu, God luk.