Psalm 38:1-15

¹MAING, der kotin kaloke ia ni omui kupur sued, o der kame ia ni omui ongiong.

²Pwe sapwilim omui kanangan kasik katieu lel dong ia, o lim omui katoutou ia.

³Sota mau kot ni pali war ai pweki omui ongiong, o sota moleilei nan kokon ai kan pweki dip ai

⁴Pwe dip ai kin kadupaledi mong ai, re kin katoutou ia dueta meakot me toutou melel.

⁵Ai ola kan posuedela o nanan pweki ai pweipwei.

⁶I kin kos pena o pairok wei alialu, i kin insensued ansau karos,

⁷Pwe longelong ai mongedier melel, o sota mau kot ni pali war ai.

⁸Ngai luetalar melel o i wokiwok pasanger. I kin sangesang, pweki mongiong i sota kak moleilei.

⁹Maing, kom kotin mangi ai inong karos, o ai sangesang sota rir sang komui.

¹⁰Mongiong i rerer, ai kelail ko sanger re i, o marain en mas ai pil rotorotala.

¹¹Kompoke pai o ai warok kan kin doowei sang ia, o suedeki ai kalokolok, o sau i kan kin doo sang ia.

¹²O me kin inong iong kame ia la, kin masamasan ia, o me men wia sued ong ia, kin indinda duen ar pan wiada dodok sued, o re kin widiwiding ansau karos.

¹³A ngai dueta me salongepon amen, me sota rong wasa, o dueta me lotong, me sota kak sar pasang au a.

¹⁴Ngai dueta ol amen me solar rong wasa, o sota depuk en lokaia mi nan au ai.

¹⁵A i kin auiaui komui, Maing. Komui Maing ai Kot pan kotin sapeng ia.