Psalm 35:2-15

²Re kotin ale pere o tatan mauin ap kotida, pwen sauasa ia.

³Ngapekida katieu sauasa ia ong ai imwintiti kan. Kotin masan dong ngen i: Ngai sauas pam!

⁴Me men kame ia la, en namenokala o kankaururala; o me men wia sued ong ia, en pure wei o sarodi.

⁵Ren wiala dueta dip en kisin war akan mon kisiniang, o tounlang en Ieowa sikin irail wei.

⁶Al arail en rotorotala o kitentel la, o tounlang en Ieowa en kotin pakipaki irail.

⁷Pwe re insensara ia, pwen kame ia la, ap sota karepa, o re wia por ong ia, a sota karepa.

⁸A en seseinlek lodi ong kalokolok; o insar me a wiadar, pein i en lodi ong; o mela en lel ong i wasa o.

⁹A ngen i en perenki Ieowa o polauleki a kotin sauasa ia.

¹⁰Kokon ai kan karos pan inda: Maing, is me rasong komui? Pwe kom kotin sauasa me luet o ong me a sota itar ong, o kom kotin sauasa me luet o samama ong me lolap akan.

¹¹Saunkadede likam kai u ong ia, kalelapok re i, me i sota asa due.

¹²Re kin depukki me mau me sued, pwen kainsensuede kin ia.

¹³A ngai, ni ar somau, i puri ong nan tuk en likau, o kaloke pein ngai ni ai kaisesol, o kapakap sang mongion i.

¹⁴Ngai wiai ong ir dueta ong kompoke pa i o udan ri ai; ngai insensued dueta amen, me kin loleitki in a.

¹⁵A irail peren kida ai sikilikel o pokon pena. Men lalaue pokon penang ia o song en aramas, me i sasa, kin lalaue ia ansau karos.