Psalm 146:6-10

⁶Panya paluṟu ilkaṟi manta uṟu kuḻu paluṉu munu mai kuka kutjupa kutjupa uwankara kuḻu paluṉu. Munu paluṟu kalkuntjatjanungku palyalpai alatjiṯu.

⁷Munu ngaḻṯutjara tjuṯa ngunti kurannyangka nyakula paluṟu tjukaṟurungku ngurkantankupai munu tjananya aṯunymankupai. Paluṟu paḻtjatjiratja nyinanyangka tjananya paḻtjalpai. Munu kuranguṟu puḻkaṟa kuliṟa tjituṟu-tjituṟurinyangka nyakula ngaḻṯunytjungku alpamilaṟa unngu pukuḻmankupai. Panya tjailangka nyinanyangka mayatjangku wangkara walatjunkupai, palu puṟunypa Mayatja Godalu nyakula alpamilalpai.

⁸Munu paluṟu kuṟu pati aḻalpai munu tjaṟuringkula punkannyangka piṟuku pakaltjingaṟa kuṉpulpai. Mayatja Godanya tjukaṟuru nyinapai tjuṯaku mukuringanyi.

⁹Godalu malikitja tjuṯa aṯunymankupai ngura kutjupanguṟu pitjala nganampa ngurangka nyinanyangka, munu wanakaḻa tjiṯula tjuṯa kuḻu aṯunymankupai. Palu aṉangu tjuṯangku tiṯutjarangku kura kutju palyannyangka Godalu paiṟa iyalpai walytjangku kuliṟa kuraringkula ilunytjaku.

¹⁰Uwa, mulapa Israelkunu tjuṯaku God kutju mayatja puḻka mulapa tiṯutjara nyinaku. Kala palunya kutju waḻkunma Mayatja puḻkanya.