Proverbs 5:8-21

⁸Imet uwuta ko kawam kuringi me namar, agi kumik duap te me dagiko.

⁹Ni uwuta bitar mu ka mel ningo ningo waru saparko; ale nongomang magara ko kariimet nuguting te tom maiya biya maga kuena lagerko.

¹⁰Se ka mel ningo ningo mu kariimet iwareng no maguwumonko; se ka ura kowar mu kari bo kigilik ko kawam tugumokko.

¹¹Se kuera memek ka iluwok se kimik sokelel wetang te aratuk se kuera ko tom ka irok se nia kika lagerko.

¹²Ale keta nimi manaru ale balu, “Ani agata den ningo te ningo la bagarikko aga kasurukasan wore me karo tuem;

¹³aga kausa se kiti guruga kari alo nuguring me karo nungarem.

¹⁴Buta se aitak ani kariimet biya nomotam te dola magawasam,” meko.

¹⁵Ni ka yu kuting ni keta te yu nasam uwutatala, ni ka niwus kota diram ilak bagerko.

¹⁶Ka yu kuting mu anape ko gi ale karogo nama ngual ngual waru karogo gerageko?

¹⁷Yu kuting mu nika, se nika diram, bo iwareng ilak me nimi tui noko.

¹⁸Ni ka imet ilak kulak te la ninimi giman mu ko amilmiler, se nu neman taukko.

¹⁹Nika niwus mu nika yawara, se mel balayam ningo bo iwita; nu nika kueso, se ni nu ko kuar se nu neman taukko.

²⁰Se aga namar, ni anape ko kari bo ko imet kowom karo se lagerko? Ale anape ko lage luan imet nika imet iwita ilukuawu lagerko?

²¹Ikiko! Kari ko munan suen la mu Yawe ari saposo; ale ko namara taira suen la mu ko iki saposo.