Proverbs 4:1-23

¹Aga namarari alo, kiti guruga den ani nenenga nenet balsam imi ikial ale ko nunguning talko.

²Den ani ninga manorsam mu nunguningta, se ningamili me saparukko.

³Ani gotektir la aga ayam ninguru aga kuakaso; ani aga ait ayam nongorak bagakasam,

⁴se aga ait iwita aga manarukaso: “Den ka manorsam imi gemang motam lilim ningi bitar ale ilukuawur, ale karo tui mu ni terong la bagerko.

⁵Ikia sinar ilukuawur ale sinar la lagerko; aninga den kamili me saparuk se lage kigilik me karoko.

⁶Ni ikia sinar me biring tuiko; kua tui se nu ka bituok ale ka sinar taukko.

⁷Mu awuk, ikia sinar mu mel biya nunguningkiri; ka melmasak suen la ira kutuwur ale kupu ale to ale ko sinarerko.

⁸Ikia sinar ko kuar se nup biya kisokko, to ale ilukuawur se nip ningo kisokko.

⁹Nu mel yawara, kitigat balayam iwita, sipiling te bitirukko.”

¹⁰Aga namar, aninga den iki ale karo tui ale te tom maiya biya ali imi te bagerko.

¹¹Ani ikia sinar ko munan ka kasursam, ale lage ningo te ka betesam;

¹²se te aolak ilup mu mel bo siwik me siruwurok, se nagur mu mel bo me ka taliparukko.

¹³Ni kiti guruga ko den imi ilukuawur ale ko sinar to, se daiga bagara ningo kisokko.

¹⁴Ni kari memek nunga nomolak me karo tui, ale munan betesan mu ni me bitarko.

¹⁵Ni lage umu kia kapar ale me te aolak ilupko; bita to ale lage bo kigilik te namarko.

¹⁶Kari memek alo mu memek bo me betemon mu, me ta taga animon ale nonoman sapamonko; kari bo memek te betemon mu asele, taga animon ale animonko.

¹⁷Nuna munan memek mu inang nokoyam nasan, ale kager daong mu yu nokoyam nasan.

¹⁸Munan ningo diram kaora ko kariimet alo nunga bagara aolak mu, worem turomola basuso ale nikim kaposo, nama kowarkalal eng am nikim biyala kaposo iwitata.

¹⁹Bare munan memek kaora ko kariimet alo nunga bagara aolak mu, sor tiromorom biya ningi baga kam; se mel bo nunga taliparuk mu awuk ko ari ikimonko? Mena.

²⁰Aga namar, degewa tagir ale den balsam mu ninguru ikiko.

²¹Ale gemang motam ningi bitar ale ninguru ilukuawurko.

²²Mu awuk, ni umu te bagara aolak ningo arik, se nika kimik lilim ko kuera ikes mu menawurokko.

²³Mel gira nunguningkiri mu ni ka gemang motam ko sinar toko; mu awuk, borta nika bagara aolak suen la kiti guruguwoso.