Proverbs 29:4-20

⁴King diram la betera ko munan te sor bitarso se gek am aora la aniso; bare king kariimet nongote manga gira agowom la gi lagoso, mu sor parusuwuso maguwuso.

⁵Munan memek betera ko kari gomang kuluka ko den mu, dagarok memek kira bita kam.

⁶Memek betera ko kari mu ko memek umu dagarok iwita taliposo; bare kari ningo diram wur iluwok ale amilmilarukko.

⁷Kari ningo diram mu, diram ningo la kariimet kituwura nungumik te betera mu ko sail tagi lagoso; bare kari memek mu uwuta me beteso.

⁸Ikia sinar suwik sapara ko kari alo mu kariimet ngual nungarsan se wonong tuagu ningi kager pagoso; bare kari sinar alo mu nongomang memek ko munan biriruwu gilingisan.

⁹Kari sinar bo munak te kari ngualara mu ilak aratukko, bare kari ngualara mu gomang magaruk se sail sail te baluk ale bala umu te ningo bo me aratukko.

¹⁰Kari nuguting gue ago mu, kari munan diram la bita lagoso mu me ta ko kuesan ale nunga momon se kuemonko lage kupusan.

¹¹Kari ngualara mu ko gomang magara mu tama iwita pagoso; bare kari ikia sinar ago mu ko gomang magara mu ninguru kiti guruguso.

¹²Kari dom biya pempem la den kawel ko dogowa gurugu lagoso, mu ko supuling alo nu bowa ningi mu kari memek ko aratu sapamonko.

¹³Kari kituwura ta se kari nu bita maguwuso mu ta, nuna wete mu Yawe nomotam nungaram ale marak nungaram.

¹⁴King bo kariimet suen la ningo la nunga beteso uwutatala kariimet kituwura nunga beteso, mu nu kam maiya biya king ko lagarukko.

¹⁵Kuriang ko memek te kausa ko bu mu ikia sinar kuriang tuso; bare kuriang katir me due iluwa mu nuam gomang ikup tuso.

¹⁶Tom kari memek kuwim gi gi namasan, mu kiwem memek karogo la sokel taso; bare tairate kariimet ningo diram mu nomotam te dagulu namamonko.

¹⁷Ka namar kiti gurugu se noko kiwem mu gemang lila kisokko; nu gemang motam amilmil tuokko.

¹⁸Tom prophet alo nunga nuguring te ko den bo me arataso, mu kariimet am ngual kasik namasan; bare awiriya Yawe ko den karo tuso mu amilmilarukko.

¹⁹Ni ka ura kari due toko kiring te la me manaruko; nu nika den ikiok, bare me karo tuokko; bu tua mu nu sangukko.

²⁰Kari ngualara ma balsan mu saonga taukko lage katir karogo. Bare ikiko! Ngual kasik munakara ko kari munakoso mu saonga taukko lage bo mena.