Proverbs 28:4-23

⁴Fa’anra dariy fan e motochiyel u wun’um, ma ga bay ko ba’ ni kireb, ma fa’anra ga be fol riy, ma ga be togopluw ngorad.

⁵Girdi’ ni kireb e der manang fan e tin nib mat’aw, machane pi’in be liyor ngak SOMOL e yad mnangfan ni bfel’ rogon.

⁶Kabfel’ ni ga ba gafgow ma ga ba yul’yul’ ko bin ni ba yo’or ban’en rom ma gab sasalap.

⁷Pi’in pagel nma fol ko motochiyel e ba llowan’, machane pi’in ma m’ag fager ko girdi’ ni dariy ban’en ni bfel’ ngay e yadra k’artamra’ ko gallabthir rorad.

⁸Fa’anra fel’ rogom ko ris ni ga be yin’ ko salpiy rom ma kemang i tay ngom ni ga be gafgownag e girdi’, ma fla’ab rom e bayi fanay be’ nib gol ngak e pi’in gafgow.

⁹Fa’anra damur fol ko motochiyel, ma Got e ra dabuy ni nge motoyil ko pi meybil rom.

¹⁰Fa’anra mu bannag be’ nib yul’yul’ nge denen, ma ga ra mul ngalan e wup ni ka mu tay. Ma be’ ni bfel’ e rok e ra yib puluwon ngak ni bfel’.

¹¹Girdi’ ni yo’or ban’en rok e gubin ngiyal’ ma yad ma leamnag ni yad ba gonop, machane be’ nib gafgow ma bay e nangan’ rok u rogon e girdi’ e ba ga’ e llowan rok.

¹²Nap’an nra tolang be’ nib mat’aw me madnom gubin e girdi’, machane nap’an nra gagiyeg be’ nib kireb, me mith e girdi’.

¹³Dabi fel’ rogon e yafos rom ni fa’anra ga be guy rogon ni ngam mithag e pi denen rom. Mu puwofaynag ma ga pithig pa’am riy; me wurngan’ Got ngom.

¹⁴Mu fol rok SOMOL ni gubin ngiyal’ ma ga ra par ni ga ba felfelan’. Ma fa’anra ga ba gelan’ ma ga ra gafgow.

¹⁵Girdi’ nib gafgow e ba waer gelingrad u puluwon ba tagagiyeg nib kireb; rogon ngorad e bod ba layon ni be tolul ni kanim’ ngak ko morus ara ba bear nike taf daken.

¹⁶Ba tagagiyeg nde tamilang laniyan’ e ra gafgownag e girdi’; machane be’ ndabun e sasaliyab e ra gagiyeg nib n’uw nap’an.

¹⁷Be’ nib buch e rok ko mathang pogofan e be ker e low rok nike musmus payngin. Dab mu guy rogon ni ngam taleg.

¹⁸Mu yul’yul’ ma ga par ni dabi buch ban’en rom. Ma fa’anra dam yul’yul’ ma ga ra mul nib tomgin.

¹⁹Ba girdi’en e milay’ nib gel ko maruwel e ra yo’or gan. Girdi’ ndariy ban’en ni yad ma rin’ e gubin ngiyal’ ni bay ur gafgowgad.

²⁰Girdi’ nib yul’yul’ e yad ra par nib n’uw nap’an ma bfelfelan’ e yafos rorad. Ma fa’anra ga be gur nagem ni nge yo’or ban’en rom, ma yira gechig nagem.

²¹Ba kireb ni ngu’un lanyan’. Machane boch e pi tapuf oloboch e rayag ni ngan l’egrad nga bochiyang i taban e flowa.

²²Girdi’ ni bfel’ ngak e yad be gur niged yad ni nge yo’or ban’en rorad, ma darir nanged ni aram e nge anog e gafgow.

²³Mu yal’uweg be’ mra tomuren ma ra fel’uwan’, ko bin ngu’um pi’ ngalang ko thin.