Proverbs 27:16-26

¹⁶Kuring kaloko maona mu, marir kiting te iluwa ko karogo kaeya laga kam, agi oil kiting tuagu ningi iluwa ko karogo kaera iwita.

¹⁷Ain te ain palungursan; uwutatala, kari nunumi kasursan.

¹⁸Awiriya tam fig ko sinar taso, mu ko nunguning sang gi naukko; uwutatala, awiriya ko kari dom ko sinar taso, mu koma nup ningo taukko.

¹⁹Yu ningi tatagasam ale yu ningi kema motam arigisam uwutatala, kari ko munan mu ko gomang motam wetang saposo.

²⁰Magara kuenera se kuera mateng kariimet kuesan mu nunga lakuso, bare bo karogo ko yam aiwoso; koma suanta tala, kariimet nanga namotam mel suen la ari saposo bare tom bo te me kuring arataso.

²¹Gold se silver nunguning agi buawen mu ko ikia ko mu, tama kowar biya wore ningi kaisan ale asele ko ikisan; bare kari bo bala ningo kumik ko balu ale mel tui, se nu aguwaya koma ko bitiruk, umutang te ni kari umu kari aguwaya mu ko kiwem ikiko.

²²Ni supuling lagara ko kari mu kanga ko manga te ita parusuwur, agi tapiok iwita irir, bare ko ngualara mu me ta kutuwu saparko.

²³Ni ka sipsip se ka goat aguwaya bagasan mu ninguru nunga iki ale ninguru nunga bitaruko;

²⁴mu awuk, mel ningo ningo ilu biguwurem mu ura tui se iru me gi, mu nama menarukko; se ka nip ningo mu am menarukko tala.

²⁵Ka sipsip goat nunga na ko, sirsir bataguru bolala awur se iru aragukko.

²⁶Se sipsip mone batutumur gi ale ka guang te nunguruko; ale ka goat sang dier ale manga to ale aking ali iru te dierko.