Proverbs 26:10-25

¹⁰Kari dom biya mu kari ngualara agi, kari murum kuwim karogo geragawara, mu nunga gi ura te nunga awuso, mu ko ariga, kari daga gotek ngual ngual tagiso ale kariimet te ngual ngual nunga moso wore toroman.

¹¹Kausik bo kapso ale aking ko kapara naso iwita, kari ngualara mu ko kiwem memek mu gira awom la beteso.

¹²Ikia mena ko kari bo kota numi balam nu ikia sinar ago mam se arigem e? Ikiko! Kari ngualara mu saonga taukko lage katir karogo; bare kari ikia mena mu saonga taukko lage bo mena.

¹³Kari gagor mu balso, “Lion bo lage te bagoso, lion mu lage karowoso!” maso, ale ura mena kawam ningi la baga lagoso.

¹⁴Songkuring sapasan se namoso taiso iwita, nu ko anira kuwim te titimam baga se, beta sang guruga katir la, aking sang guruga katir la ma se aniwoso.

¹⁵Kari gagor mu tawir ningi inang taukko kuting garukuso; bare inang patawuruk kuring te bitirukko mu ninguru gagorso!

¹⁶Kari 7 mu ikia sinar ago isa koma ningo la baluwasan mu, kari gagor mu kota numi ko balso, noko ikia mu nononga mu kiaram ale kalel biya aniso maso.

¹⁷Kari saki den te nunumi iluwasan se kari bo am ngual kasik ningi numi beteso, mu ko ariga, kari bo kausik taiwoso se dogowa te iluso ale memek taso wore iwita, nu memek taukko.

¹⁸Kari ngualara ko munan ngualara mu, kari bo gatu kore daong karogo kariimet ningi ngual ngual tagiso wore iwita.

¹⁹Uwutatala, noko munan bo mu, kari bo mel bo nunguning mena wore ko tiran bo kulurso se ko gomang ningi nunguning aso, se udagi aking balso, “Ah, ani den kolara balem pa!” maso.

²⁰Tama kower mena mu tama iriso; uwutatala, kari buring ko bala ko munan mu mena, mu alis ining ko sokel kua kaposo.

²¹Tam kaok mu kowar biya, se tama kower iluso ale kaniso; uwutatala, ining munak ko kariimet nungumik te, kager mu tama barasukam barasoso.

²²Kari buring ko bala ko den mu inang yaman yaman iwita; se kariimet amilmil te nasan se nutagu ningi kaposo.

²³Munak welang yawara te bo ko gemang memek mu kaluwura mu ko ariga, kani bo ali te nungurman ale mel bo silver iwita, bare silver nunguning mena, wore te palunguru beteman iwita.

²⁴Kari memek mu ko munak welang welang te ko ikia yumura memek gomang motam ningi kaluwuso.

²⁵Buta se kari ni kerak memek mu yawara karogo munakaruk, bare me ko gemang ningi nunguning arukko, mu awuk, nu ikia memek duap duap karogo bagoso.