Proverbs 24:19-34

¹⁹Ni kariimet memek mu ningo la bagasan mu ko me gemang dagulokko, ale nunga mel ningo ningo karogo bagasan mu ko me ikia ka morukko,

²⁰mu awuk, kari memek mu nunga bagara aolak bo maiya biya mena, se nunga galep mu tairate la iri palagukko.

²¹Aga namar, Yawe se king nobowa ningi bagerko, ale awiriya nongorak barimawoso mu nongorak me kapeterko.

²²Mu awuk, Yawe se king ilak memek biya bo nungumik te betemonko, se ikup nuna tamonko mu ko memek aguwaya mu awiri ko ikiokko?

²³Bala imi betela ikia sinar ko bala saki: Den ariga kam te nimi kema ko me nguangerko, diram la baluko.

²⁴Awiriya kari bo memek beteram ta wore manarso, “Ni kari ningo diram,” maso, mu kariimet kumik ko bala memek balmon, se sor suen biya mu nubiring tumonko.

²⁵Bare awiriya kari memek beteso mu diram la ko memek koma ikup tuso, mu nup ningo se den ningo kumik ko kaparukko.

²⁶Tiran yawara ilu yasara ale gemang kua kapara iwita, den koma nunguning la se diram la balu kisa mu ni gemang kua kaparukko.

²⁷Matangi ko ura gek am tala nunguru sapar, ningam asuru asele, kawam kaloko.

²⁸Kawel ko munan te ka bo den te ipi me bitar, agi kiring te den kawel bo me ta aratukko.

²⁹Ni balu ale “Kari umu munan agate beteram uwutatala kote bitirikko,” ma me baluko.

³⁰Ani kari gagor mu ko ningam duap karem ale arigem, ale ko waen ningam mu karogo arigem, kari mu kumik ikia bo ningo mena.

³¹Mayang kore ago mu se sum barasam sor ira saparam; se ko ningam ko kar mu parasaram ale kaparam aniram se arigem.

³²Ani anapeya arigem mu ko iki gurugem ale mel arigem mu munan bo aga kausam:

³³Mu iwita, katir la anira ko munan, namotam kilikilok ma ko munan, se nagiting patutumu saen ko betera ko munan mu te,

³⁴kimik mel mena, kituwura bagara ko munan mu tere kari iwita tairuk ka maguwurokko.