Proverbs 23:3-27

³Dab mu nemow nigem ko fapi ggan ni bfel’ ni be pi’, ya rayag ni be guy rogon ni nge ban nigem.

⁴Ngam gonop nge dabi aw parowom i muruwliy ni nge yo’or e salpiy rom.

⁵Ya salpiy rom e rayag ni nge mul u pa’am u lan ba talab, ni gowa yib pon nge changeg nge yan ni bod ba arche’ ni manuw.

⁶Dab mu’un ko abich u tabel rok be’ nib si’in ara mu nemow nigem ko ggan ni falel’ ni be pi’.

⁷Be ga’ar, “Mmoy ngki yag boch ngom,” machane gathi aram rogon ni be leamnag. N’en ni be leamnag e ire bin riyul’ i ir.

⁸Ga ra sull’ugunag e chu’uw ni kamkoy, ma urngin e thin ni bfel’ ni u mog e ke ma’adab.

⁹Dab mu guy rogon ni ngam chep ku be’ nib balyang; ya dabyag ni nangfan nge fel’ u wan’.

¹⁰Ri dab mu n’ag gil’ e mathil ko binaw romew be’, ara mu fek e binaw ni tafen e bitir ni kanim’ rorad.

¹¹Ya SOMOL nib gel e ir e ta’ayuw rorad u tafen e puf oloboch, ni ra togopluw ngom.

¹²Mu l’eg i lim ko sensey rom ma ga fil gubin nrayag rom.

¹³Dab mu pag i llowan’nag fakam; ga ra toy ni bfel’ rogon ma dabi yim’ riy.

¹⁴Ma bin rriyul’ riy e rayag ni ayweg e yafos rok.

¹⁵Fakag, fa’an ga ra gonop, ma ra gu felfelan’.

¹⁶Gu ra uf ko ngiyal’ ni gu ra rung’ag ni ga be yog e thin nib gonop.

¹⁷Dabi awan’um ko girdi’ ni tadenen; nge par ni madgun SOMOL e ngam lik’eg u lan e yafos rom.

¹⁸Fa’anra aram rogon, ma par rom i yan e ngaram e bay e tamilang riy.

¹⁹Fakag, mu telim, um par ni ga ba gonop, ma ga be fal’eg i leamnag rogon e par rom.

²⁰Dab um cheg ngak e girdi’ ni tamu’un rrum, ara pi’in yad ma abich nge pag rogon.

²¹Pi tamu’un rrum nge pi’in yad ma abich nge pag rogon e ra yib e gafgow ngorad. Fa’anra kemus ni abich nge mol e ga be tay, ma dabi n’uw nap’an ma ga chuw ko mad nike mogchothchoth.

²²Mu telim ngak e chitamam, ya fa’an mang e de moy ma dariy owchem. Ra pilibthir e chitinam, ma ngam dag ko ngongol rom ni ga be pining e magaer ngak.

²³Tin nriyul’, gonop, fanow nge tamilangan’, irera’ e pin’en ni bay rogon ni ngan chuw’iy, ma ri dab mu pi’ ni chuway’.

²⁴Gallabthir rok be’ nib mat’aw e bay rogon ni ngar felfelan’ gow. En ra fakay be’ nib gonop e ra felan’.

²⁵Ngam guy rogon ngi i par e chitamam nge chitinam ni yow ba felan’ ngom; ngam pi’ ngak e chitinam e re felan’ nem.

²⁶Fakag, mu uthum e lim ngog, ma ga folwok rog.

²⁷Pi’in ppin ni yad ma chuway’ ngorad nge pi’in nib kireb e yad bod ba wup ni yira aw ngay mi nim’.