Proverbs 22:8-21

⁸Awiriya kiwem memek mu tam bo iwita aguso, mu ko nunguning mu memek tagi kumik te beteso; ale ko bu, kariimet saki te nunga bita maguwu lagaram, mu kilikilik maukko.

⁹Kari ko munan yawara mu, nup ningo se marak ningo kumik ko kaparukko, mu awuk, nu ko mel suen la mu kituwura alo nongorak numi tui no lagoso.

¹⁰Ikia ningo suwik sapara ko kari mu karo sapara mu te, ining singi se tagira gurungumura ko kiwem memek mu menarukko.

¹¹Awiriya munan diram la ko kueso ale ko munak mu welang yawara la, mu king ko tiran yawara ko bagarukko.

¹²Ikia ningo mu Yawe ko motam se ko bitua bowa ningi aniso; bare nu diram la me kaora ko den mu sokel menawuso.

¹³Gagor kari nu kawam ningi baga se, “Lion bo watingi bagoso,” maso. “Ani aratik bare aga nauk bore ko!” maso.

¹⁴Imet ko kuari ilak diram bagara mena mu ko den welang mu, mutim bo du biya wore iwita, se kari Yawe ko gomang magara bowa ningi bagoso, mu mutim umu ningi daguloso.

¹⁵Ikia ngualara mu kuriang gomang motam ningi aniso; bare bu te nukum tagira mu ikia mu karo saposo.

¹⁶Awiriya kituwura alo nunga melmasak giso ale noko melmasak mu karogo laguwuso, se awiriya kari melmasak suen biya ago wore gomang te kulukokko mel ningo ningo tuso, mu wete nunga melmasak mu mena namaruk se kari kituwura ko bagamonko.

¹⁷Degewa gurugu ale ikia sinar ko kari kuring te den aratuwoso wore iki ale, anapeya ka kasursam imi gemang motam ningi ilukuawurko,

¹⁸ale gemang motam te se kiring te mel yawara iwita amilmil te balu se lagerko.

¹⁹Mu awuk, ani ni Yawe te la ira sanami se lagerko owore te se, ani aitak ka kasursam.

²⁰Arikko! Ani nika bala ningo ningo 30 batagem, mu kiti guruga ko den se ikia ningo ko den.

²¹Se den nunguning ni te sanamirko mu ilukuawu se, awiriya nika isuok mu ko den koma ningo la balu tuiko.