Proverbs 22:4-19

⁴Um par ni bay madgun SOMOL u wan’um, ma ba sobutan’um, me yo’or ban’en rom, ma ga par ni yibe ta’fam, me n’uw nap’am.

⁵Fa’anra ba t’uf rom e pogofan rom, ma ngam par u orel ko pi wup ni bay u kanawo’ ni girdi’ ni kireb e ma aw ngay.

⁶Mu fil ngak e bitir rogon nthingar ra pired, mi i par u wan’rad u n’umngin nap’an e yafos rorad.

⁷Girdi’ ni gafgow e yad e sib ko en ni bfel’ rogon. Ga ra man salpiy ni malfith ma ga ra mang sib ko en ni kam malfith ngak.

⁸Fa’an ga ra yung e awoch ko tin nde mat’aw, ma riya’ e ra yib i for riy, ma gafgow ni um tay ngak boch e girdi’ e bayi tal.

⁹Mu gol ma ga f’oth ganam ko pi’in gafgow. Ma gur e ra fel’ wa’atham riy.

¹⁰Mu tuluf e en nib ufanthin, ma aram e ra tal e tugthin, toto’gor, nge yaba’.

¹¹Fa’anra ga ba’adag e gumircha’ nib machalbog nge welthin nib gol mab simnguy, ma en pilung e ra mang tafager rom.

¹²I SOMOL e ma guy ni nge par e tin nib rriyul’, ni be pug ngalang e sasalap ko pi’in malulfith l’ugun.

¹³Girdi’ nib gamead e ma par u tabnaw; miyad yog ni yad ra yan nga wean me og e layon ngorad.

¹⁴L’ugun be’ ni bpin nib gathar e bod ba low nib to’ar; pi’in ke damumuw SOMOL ngorad e yad ra mul nga langgin.

¹⁵Gubin e bitir ni yad bbalyang, ma yad ba wagagey, machane yira toyrad ni yibe llowan’ nagrad ni bfel’ rogon miyad ra fil riy rogon ni ngi i par pangirad ni bfel’.

¹⁶Fa’anra u mu fal’eg e tow’ath rok e girdi’ nib yo’or ban’en rorad ara mu gafgownag e pi’in gafgow ya nge yo’or ban’en rom, me gur e ra m’ay ban’en rom.

¹⁷Motoyil, nggu fil ngom e tin ni yog e pi’in gonop. Mu fil e machib rorad,

¹⁸ma ga ra felfelan’ ni fa’anra par u wun’um me yag ni u mog.

¹⁹Gu ba’adag ni ngam tay e pagan’ rom ngak SOMOL; aramfan ni nggu weliy e pin’em ngom e chiney.