Proverbs 19:11-24

¹¹Kari ikia sinar ago mu tairatela me gomang magoso; nu ko nup yawara mu ilukuawuso ale saki alo bita maguwusan mu mel yam iwita arigiso.

¹²King ko gomang magara mu lion nia kam; bare ko amilmil mu baras nuwi kusat sirsir yu tui kam.

¹³Supuling lagara ko kuriang mu nuet ko daiga bagara maguwuso; se kari bo ko nuwus iningara munakara ko imet, mu buwung tam irikoyam bita lagoso.

¹⁴Kawam digo se melmasak suen la nanga nainet nainam nangaru gilingisan; bare imet sinar ningo mu Yawe nangarso.

¹⁵Ani geraga lagara mu gagor ko munan; kari nukum nuam te dagi lagara mu na ko kuerukko.

¹⁶Awiriya kiti guruga den karo tuso mu ko daiga bagara ko sinar taso; bare awiriya ko munan ko me sinar taso mu kuerukko.

¹⁷Awiriya kariimet kituwura nunga saonga beteso, mu munan mu Yawe kote bita kam, se Yawe munan nu beteram mu koma tuokko.

¹⁸Ka namar gotektir bagoso la, dingumur se ko tom maiya taiwoso mu ningi ningo la bagarukko; ni uwuta me bitar mu ni karogotala nu kua namarukko lage te betesam.

¹⁹Gomang magara ko kari memek, mu koma memek am arigokko. Ni nu me ta sangaruko; ni sangaru mu ni uwutata sangaru se lagerko.

²⁰Munan den kisimon mu iki ale kiti guruga ko den mu ilukuawur, mu udagi te ikia sinar kari bagerko.

²¹Kari gomang motam ningi mu aguwaya bitirukko mu ko ikia duap duap aniso tala; bare anapeya Yawe ko gomang motam te aniso mu giriso arataso.

²²Saki alo kua nungara ko munan mu mel gira nunguningkiri. Kimik mel mena kituwura bagara mu mel bo mena; bare kawel munan te lagara mu memek biya nunguningkiri.

²³Kua Yawe bowa ningi bagara mu bagara aolak ningo nangarso; ale munan umu te ana nangamang kua kaposo se terong la baga se memek me nanga maguwuso.

²⁴Kari gagor mu tawir ningi inang taukko kuting garukuso; bare inang patawuruk kuring te bitirukko mu ninguru gagorso!