Proverbs 18:9-22

⁹En nib gamead e ta’reb feni kireb ko en nib mogothgoth.

¹⁰I SOMOL e bod ba wulyang ni tafen e damit nib gel; ni gin rayag ni nge yan e pi’in nib mat’aw ngay ma dabi buch ban’en rorad.

¹¹Ma pi’in yo’or ban’en rorad e wun’rad e fel’ rogon rorad e ra yororiyrad ni bod ba yoror nib tolang ma ba gel u wuru’ bbinaw.

¹²Pi’in tolangan’ e yad be bibiy e riya’ i yan; dariy be ni yira tayfan nge mada’ ko ngiyal’ nike sobut’an.

¹³Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.

¹⁴Lanin’um ni ngam par ni gabfos e ir e ra chibiyem u fithik’ e m’ar rom, machane fa’anra mul lanin’um ma aram e dakriy e n’en ni nge tilem.

¹⁵Girdi’ nib llowan’ e gubin ngiyal’ ni yad be nameg ni ngar filed ban’en.

¹⁶Ga ba’adag ni ngam mada’nag be’ nib tolang? Mu fek ba tow’ath i yan ngak me mom ngom.

¹⁷Cha’ ni som’on nra non u tafen e puf oloboch e yira leamnag nib pluw e tin be yog, nge mada’ ko ngiyal’ nike tabab e en be togopoluw ngak i fith u boch ban’en.

¹⁸Fa’anra malu’ag thin l’agruw ni’ ni yow ba yargal u tafen e puf oloboch, ma ngan girengiy e pow nge puf fare pa’ i oloboch.

¹⁹Mu ayuweg pibe’ rom ma yad ra ayuwegnem ni bod e yoror u bbinaw nib gel, machane fa’anra um tugthin ngorad, ma yad ra ning e mab rorad ngom.

²⁰Bay um par u fithik’ wenigan urngin e tin ga ma yog.

²¹Tin ga ra yog e rayag ni ayweg e yafos fa reb e ra thang; ere thangri fel’ u wun’um wenigan e pi thin rom.

²²Ga ra pir’eg reb e bpin ni ngam le’engiy ma aram ban’en ni bfel’ ni ka mu pir’eg; ma be dag ni SOMOL e ba gol ngom.