Proverbs 18:4-22

⁴Ikia sinar ko den kari kuring te arataso mu gagi du biya wore turan, ale aking yu bulowolok ma ale palenga kapawara wore toroman.

⁵Kilek memek bitawara ko kari nunga atumu saonga, ale kari kumik den mena mu ipi den te betera se ikup memek ipi ta, mu kilek memek nunguningkiri.

⁶Kari sinar mena mu kota ko munak ngualara munakoso umu ikup yaman tagi kumik te beteso.

⁷Kari ngualara mu kota ko munak te numi maguwuso; se ko den mu dagarok iwita taliposo.

⁸Kari buring ko bala ko den mu inang yaman yaman iwita; se kariimet amilmil te nasan se nutagu ningi kaposo.

⁹Kari kua ani ani lagara mu melmasak maguwura ko kari iwitatala.

¹⁰Yawe mu kawam aora bo kalel biya sanamiwoso wore toroman; se kariimet ningo diram mu te nagu nama yumusan.

¹¹Kariimet nungumik manga mel suen biya ago mu, nunga melmasak umu kar aora bo nunga lautam nongorak bagoso iwita ikisan.

¹²Kari bo me dagula la, mu nu numi patawura ko kari; bare nanimi karogo kapara ko munan mu te nup ningo tasan.

¹³Den ninguru me ikia ale tairate koma bala mu memek se dolara karogo.

¹⁴Kuera ikes memek ningi baga se wore ka gemang motam sokel karogo la bager, mu am baga lagerko; bare gemang motam sokel menaruk, mu tom maiya biya me bagerko.

¹⁵Ikia sinar kari mu guyak la ikia ningo taso, ale bo karogo ikiokko due gurugu lagoso.

¹⁶Kariimet mel tua ko mel mu, nika lage kuring am kaguk se kari nup biya ta wore am kote nama aratuko.

¹⁷Den ariga tom te, kari giriso munakoso mu ni ko den ko gemang ningi am nunguning arukko tala; bare aking kari bo tala aratuk ale isaru gurungumurok, mu te ni kamin biya gotek yenerukko.

¹⁸Tom kari ilagala munak te nunumi ilumon nama gek mamon, mu munan sang te awiriya nunguning se awiriya kawel mu te ikiko mu bitar ale Yawe kuting te bitarko.

¹⁹Tiran yawara bo bita maguwura ale aking gomang ta ko karogo kaera mu mel ikup; mu songkuring ain te nunga, agi por aora bo ninga kusumuri anira iwita.

²⁰Munak aguwaya kiring te arataso mu ko koma uwutatala peleruk se no ale tagu lagarukko; se ka kiring ko koma mu eng am diram la toko.

²¹Marak bagara ko den se kuera ko den mu nangamili kopa te aniso; se ni aguwaya mu ko kuar ale balu mu ko koma uwutata toko.

²²Kari imet bo, ko nuwus ko taso, mu mel yawara bo arigam, se Yawe ko amilmiloso.