Proverbs 17:3-13

³Gold se silver nunguning agi buawen mu ko ikia ko mu, tama kowar biya wore ningi kaisan ale asele ko ikisan; bare kari ko gomang motam mu Yawe kota gurugu patawu ko ikiso.

⁴Kari memek mu ikia memek ikiokko ninguru due tagiso; uwutatala, kawel kari mu den kawel ikiokko ninguru kueso.

⁵Awiriya kariimet kituwura nunga doleng saposo, mu nu Awiriya nunga nungam mu agotala ko doleng saposo; uwutatala, awiriya kariimet sang ikup arigisan se nu ko amilmiloso, mu nu me yumu namarukko.

⁶Kariimet garuk mu nunga nunumasari te nunup biya kaposo; iwitatala, kuriang alo mu nunam nonet mu nunup biya nungarsan.

⁷Ikia sinar ko den mu numi patawura ko kari kuring te me arataso, mena; bare tom bo te aratuk agi mu, ni ninguru ko sinar toko! Uwutatala, kari supuling kuring te den kawel mu me arataso, mena; bare tom bo te aratuk agi mu, ni ninguru ko sinar toko!

⁸Manga mel kari tua ale diruwura se mel ningo tere gi karogo tai kisa ko munan mu, kari sika nunga mel ningo, te to no laga gilingisan.

⁹Awiriya bo ko memek siwu saposo, mu nu nanimi ko kuera ko munan sokel tuso; bare awiriya bo ko memek umu balu balu geragoso, mu nu tiran ningo nunga parusuwuso.

¹⁰Kari ikia ningo ago mu ko memek tom suanta ko manaru, mu nu pasak ala ari ko ikiokko; bare kari supuling lagara karogo mu tom 100 iwita moa maguwur, bare am me ta ikiokko!

¹¹Kari memek mu supuling lagara se dun kopa iluwa ko kiwem mu ko kua lagoso; bare kari bo wuli karogo mu betemon se namaruk ale ikup yaman tuokko.

¹²Bear nuam ko gotek tere namon se gomang magawuruk mu koma te aratuko mu, sinar toko; bare kari ko ikia munan memek nunguningkiri mu memek bitawuruk se koma te aratuko mu, eng am ninguru ko sinar toko! Umu asele memek ko memek arikko!

¹³Awiriya munan ningo mu ko koma munan memek bitiruk, mu memek mu ko kawam digo lilim me ta bita taukko.