Proverbs 15:7-31

⁷Kariimet ikia sinar ago mu, ikia ningo ningo kariimet saki nunga kasursan; bare nusupuling lagara alo mu uwuta me betesan.

⁸Yawe kariimet memek nunga tama betera mu biriruwuso; bare nu kariimet ningo nunga guranek mu ko amilmiloso.

⁹Yawe kariimet memek mu nunga bagara aolak biriruwuso; bare nu kariimet munan ningo diram karo tui lagasan mu nunga kueso.

¹⁰Awiriya lage ningo buring tuso, mu ikup yaman arigiso; awiriya ko memek kasursan mu ko gomang ikuwoso, mu kuerukko.

¹¹Kariimet kuera nunga nuguwim mu wetang te Yawe koma te aniso; ewere te se, kari gomang motam mu, awuk Yawe motam te yumurokko?

¹²Ikia sinar doleng sapara ko kari mu ko memek kasuru, mu gomang magarukko; nu kariimet sinar mu nunga dulokko.

¹³Kari gomang ningi amilmil ago, mu ko koma motam amilmil ago; bare kari gomang motam ikup yaman ago, mu kumik sokel kapa saposo.

¹⁴Kari sinar mu ikia ningo ko ninguru kua lagoso; bare supuling lagara ko kari mu munan memek mu na ko kuakoyam ko kua lagoso.

¹⁵Awiriya ikup yaman memek ningi lagoso, mu ikup biya se maga kuena lagoso; bare awiriya gomang motam amilmil karogo, mu amilmil te no nungia se lagoso.

¹⁶Mel katirta ago baga se Yawe bowa ningi la baga lagara ko munan mu, kari kumik mel suen biya karogo se gomang motam daung daung lagara ko munan kiaram.

¹⁷Na inang mamis memek nimi tui no se nimi ko kua se lagara mu, munan yawara nunguning; bare bulmakau gotek moa kaiya ale inang yawara karogo no se, nimi kore bataguru se nimi ko me kuera mu, munan memek nunguningkiri.

¹⁸Kari ko gomang motam magara tairate, mu ining singi tagi kariimet ningi beteso; bare kari gomang motam lila ago, mu daiga bagara nungurso burangoso.

¹⁹Kari gagor ko lage mu mayang singir ereso; bare kari ningo ko lage mu wetang biya.

²⁰Kuriang ikia sinar ago mu, nuet gomang motam amilmil tuso; bare kuriang ikia aora biya, mu ko nuam mel yam ko beteso.

²¹Kari ikia ningo mena, mu munan memek ko amilmiloso; bare kari ikia sinar ago, mu diram la aolak iluso.

²²Saki alo nunga den sinar yawara biring tua, mu ka ura bitar mu nama dagulokko; bare nunga den sinar te sanamir, mu ka ura nunguning kaparukko.

²³Den ninguru ko iki gurugu laga koma bala, mu amilmil kisokko; ale tom te bala ko mu te iki guruguwa te diram bala, mu ningo nunguningkiri!

²⁴Kari ikia sinar ago mu, bagara aolak diram ko lage karoso ale ningo nuam ningi nama tarigiso, ale mutim ningi dagulu namara ko lage memek mu kia kaposo.

²⁵Yawe kari numi patawura ago mu, ko kawam digo mu parusuwu warso; bare nu imet gerewa ko por, mu sokel tuso.

²⁶Yawe kariimet memek alo nunga ikia memek biriruwuso nunguningkiri; bare munak welang lila ago mu nu ko amilmiloso.

²⁷Kari guing talal mu nuwus kuriang ikup ningi nunga beteso; bare kari memek bitirukko dia gilingisan bare biriruwuso, mu ningo la bagarukko.

²⁸Kariimet ningo diram mu, den koma aguwaya balmonko mu, ninguru ko iki gurugu se balsan; bare kariimet memek mu, den memek se bala memek nuguring te aratu lagoso.

²⁹Yawe kariimet memek alo mu nunga nuguring me ta ikiso; bare nu kariimet ningo diram alo nunga guranek ikiso ale nuguring iluso.

³⁰Den gilalong gia ko kari koma motam gusira amilmil ago kete tairuk, mu gemang motam amilmil tuokko; ale den ningo mu degewa kaura mu, kimik sokel ko ikes menawu kam.

³¹Ni kari saki ka bagara aolak ningo la te pempem lagerko de ilumon se ko amilmiler, mu ni kari ikia sinar bo ko iwita lagerko.