Proverbs 15:1-14

¹Bo gomang memek te munakawara se lila welang te koma balu tua mu, noko tama iruwuso; bare alis ago den koma balu tua umu, tama bo karogo kasi gomang motam ningi bita kam.

²Ikia sinar kari munakoso, mu ikia ningo ningo kuring te arataso; bare supuling lagara ko kari munakoso, mu bala memek duap duap kuring te arataso.

³Yawe sor suen la ari kutuwuwoso, kariimet memek se kariimet ningo aguwaya betesan mu am ari sapawoso.

⁴Den welang lila ago mu kariimet ninguru nunga sangarso; bare kari kuamili kuring den memek ago, mu kariimet nongomang motam parusuwuso.

⁵Kuriang supuling aora biya mu, nuet due iluwa ko den manarso mu tuer pateso ale buring tuso; bare kuriang iki karo tuso, mu nu kuriang sinar.

⁶Kariimet ningo diram nunga kawam te, mu mel yawara yawara suen biya aniso; bare kariimet munan kawel te meltutuk gisan, mu meltutuk mu ikup ningi nunga awurokko.

⁷Kariimet ikia sinar ago mu, ikia ningo ningo kariimet saki nunga kasursan; bare nusupuling lagara alo mu uwuta me betesan.

⁸Yawe kariimet memek nunga tama betera mu biriruwuso; bare nu kariimet ningo nunga guranek mu ko amilmiloso.

⁹Yawe kariimet memek mu nunga bagara aolak biriruwuso; bare nu kariimet munan ningo diram karo tui lagasan mu nunga kueso.

¹⁰Awiriya lage ningo buring tuso, mu ikup yaman arigiso; awiriya ko memek kasursan mu ko gomang ikuwoso, mu kuerukko.

¹¹Kariimet kuera nunga nuguwim mu wetang te Yawe koma te aniso; ewere te se, kari gomang motam mu, awuk Yawe motam te yumurokko?

¹²Ikia sinar doleng sapara ko kari mu ko memek kasuru, mu gomang magarukko; nu kariimet sinar mu nunga dulokko.

¹³Kari gomang ningi amilmil ago, mu ko koma motam amilmil ago; bare kari gomang motam ikup yaman ago, mu kumik sokel kapa saposo.

¹⁴Kari sinar mu ikia ningo ko ninguru kua lagoso; bare supuling lagara ko kari mu munan memek mu na ko kuakoyam ko kua lagoso.