Proverbs 14:2-31

²Kari ko bagara aolak diram mu Yawe bowa ningi la lagoso; bare kari ko aolak memek mu Yawe mel yam ko beteso.

³Kari ngualara numi patawura ko munak balso, mu ko koma taukko; bare kari ikia sinar ago ko munak mu nu bitarso.

⁴Inang bulmakau naukko mu mena mu, ni anape ko bulmakau karogo bagerko? Bare aking bulmakau mena mu, ni awuk inang sor maga kisokko?

⁵Den nunguning bala ko kari mu biguwura motam te den bo me kaluwuso; bare den kawel bala ko kari mu kawel gurugokko.

⁶Ikia sinar suwik sapara ko kari mu ikia sinar kupok, bare bo me arigokko; bare kariimet ikia nunguning ko ikia, mu guyak la sinarsan.

⁷Kari ngualara ilak me kapeterko; mu awuk, ni den sinar bo kuring te me ta ikiko.

⁸Kari sinar mu, ikia sinar lage tuso; bare kari sinar mena mu, kota ko ngualara mu te numi kulurso.

⁹Nusupuling aora biya alo mu, memek mu mel gotek ko balsan; bare nanimi nangamang tui se bagara suanta ko munan mu, kariimet diram alo mu nunga ningi aniso.

¹⁰Kariimet suan suan kota ko gomang motam yaman ikup mu ninguru ko ikiso; uwutatala, noko amilmil ko sokel mu ko iki saparko me terong.

¹¹Kari diram ko kawam mu am sanamiwurukko; bare kari memek ko kawam mu dagulok ale parasarukko.

¹²Kariimet sang ikisan nuna munan lage karo tusan mu diram la ma balsan. Bare mena. Nuna karosan nama eng memek arigisan ale kua namasan.

¹³Gusira amilmil ko munan am betenakko, bare naneman bataga ko munan mu tom sang am aniso; se amilmil gusira niara mu menaruk, bare mu nangamang bataga mu aking am nangate anirukko.

¹⁴Kariimet memek mu nunga betera kaora memek mu ko nunguning la tamonko; se kariimet ningo mu betelatala, nunga betera kaora ningo mu la ko nunguning tamonko.

¹⁵Kariimet nunga ikia ninguru me sinarara alo mu, anapeya balu mu am iki karo tumonko; bare kariimet ikia ago, mu nuna nunga bagara aolak ko ninguru sinar tasan.

¹⁶Kariimet ikia sinar ago, mu nuna munan memek ko ninguru nguangasan ale nubiring tusan; bare kariimet ikia sinar mena, mu nuna anapeya betemonko mu ninguru me ko ikia tasan, mu am tairatela betesan.

¹⁷Kariimet nunga nongomang magara tairate, mu ngualara ko kilek memek tairatela betesan; se aking kariimet saki nunga kawel mu yumura te la, bare kariimet nunga iki gilingisan mu me nunga kua gilingisan.

¹⁸Kariimet nunga ikia tukunangta, mu nunga kilek ngualara mu ko koma diram tasan; bare kariimet ikia ningo nuam ago, mu ko koma nuna ikia ningo nuam biya tala tasan.

¹⁹Kariimet kilek memek bita lagasan mu maingte kariimet munan diram betesan mu nunga nobowa ningi karangamon taimon ale nubugura kulukurmonko.

²⁰Kariimet nunup mena, nungumik mel mena, mu kariimet sang nungarkasan mu me nunga ikia iwita nungarki patesan; nunga singsang nunguning tala wore am uwutata nungumik te betesan. Bare kariimet nunup ago, nungumik mel suen biya ago, mu kariimet suen la nunga sikisaki ko iwita nunga balsan ale nunga kuesan!

²¹Awiriya ko bo mel yam ko beteso, mu nu memek beteso; bare awiriya kariimet ikup ago mu nunga sangarso, mu amilmilarukko.

²²Ni kilek memek bitarko ikia to lager, mu ni lage ningo supurem ale lage memek karosam; bare ni pempem kilek ningo bitarko ikia to lager, mu kariimet nongomang kisimon ale tom suen biya te kerak bagamonko.

²³Ni ura kowar ilup, mu ni ko koma yawara toko; bare ni yam dagi munaka lager, mu ni kimik mel mena bagerko.

²⁴Kariimet ikia nunguning nongote ago, mu koma mel yawara yawara gisan; bare kariimet ikia nunguning nongote mena, mu nunga ngualara kilek mu eng am butata aniso.

²⁵Kari den ariga te den nunguning la balso, mu kari sangarso; bare kari den kawel balso mu saki alo memek te nunga beteso.

²⁶Awiriya Yawe bowa ningi bagoso mu terong la lagoso; se mu noko kuriang nunga yumura kuwim tala.

²⁷Yawe bowa ningi bagara mu kari ko bagara aolak sangarso, ale kari kua namara ko lage te mu sangaru taso.

²⁸King ko kariimet biya te nup biya taso; bare kariimet mena, mu king nup mena tala.

²⁹Awiriya ikia ningo karogo mu numi ira ko kari; bare kari gomang motam tama ko kaniwara mu ngualara munan beteso.

³⁰Nangamang motam lila te bagara mu nangimik lilim sokel tuso; bare nangamang magara mu nangimik lilim maguwuso.

³¹Awiriya kituwura alo nunga bita maguwuso mu Awiriya nunga nungam mu mel yam ko beteso; bare awiriya kariimet mel mena mu nunga sangarso, mu nu Kaem nup biya tuso.