Proverbs 14:2-17

²Mu yul’yul’ ma ga dag ni bay madgun SOMOL u wun’um; mra dab mu yul’yul’ mra m’ug ni dariy daguwen u wan’um.

³Pi’in balyang nib ta’ufan e ba mak’ welthin langrad; ma thin ko gonop e ra aywegrad.

⁴Ra dariy e garbaw ni nge girengiy fen e gi’ but’ mra par e naun ni tafen e ggan rom ni dariy ban’en riy, machane ra bay e garbaw mra sug ko grain.

⁵En nib pagan’uy ngak ni nge mang mich u ban’en e gubin ngiyal’ nma yog e tin rriyul’, ma be’ ni nge mang mich ni der pagan’uy ngak e go’ ban e ma yog.

⁶Girdi’ nib ufanthin e dariy e ngiyal’ ni yad ra gonop, ma girdi’ nib tamilngan’ e ba mom nma mit ban’en ngorad.

⁷Mu par u orel rok e pi’in balyang; ya dariy ban’en ni ga ra fil rorad.

⁸Mangfan ni be’ ni ba llowan’ e ba gonop? Bochan e manang e n’en ni ngan rin’. Mangfan ni be’ nib pinat e bbalyang? Bochan e ma leamnag ni manang.

⁹Girdi’ nib balyang e dariyfan u wan’rad ni yad ra denen, ma girdi’ ni manigil e ba’ndag ni ngan n’agfan e kireb rok.

¹⁰Felfelan’ rom e fanam; kirban’ rom e fanam. Dariy be’ nra fana’ boch.

¹¹Naun rok be’ ni bfel’ e ra par u lang u tomuren nike puth e naun rok e en nib kireb.

¹²Re kanawo’ ni ga be leamnag nib manigil e rayag ni nge sor ko yam’.

¹³Minmin e mang e ra mithag e kirban’. Ma nap’an nra chuw e felfelan’, ma gafgowan’ e bay u rom ni gubin ngiyal’.

¹⁴Girdi’ ni kireb e ra sul taban e kireb rorad ngorad. Girdi’ nib manigil e yad ra fek puluwon e gafarig rorad ni bfel’.

¹⁵Be’ nib balyang e yug demturug ban’en mra mich u wan’; ma girdi’ nib tamilngan’ e ri ma fal’eg i yaliy ban’en.

¹⁶Girdi’ nib sul lanyan’ ngak e yad ma guy rogon ni ngar pired u orel ko oloboch, ma girdi’ nib manan’ e yad ba wagagey ni yad ma ngongliy ban’en u fithik’ e gur gur.

¹⁷Girdi’ nib gel e damumuw rok e yad ma rin’ bogi ban’en u fithik’ e balyang; ma girdi’ ni yad ba gonop e yad ma par ni yad ba paslog.