Proverbs 12:9-27

⁹Munan nunguning mu iwita: kari kituwura ko baga se ke kimik ko ura bitar mu terong; bare kimik mel mena wore nimi kaluwura ale mel suen biya ago iwita baga se inang ko kua lagara mu munan kawel.

¹⁰Munan diram ko kari mu ko buruk kausik mel ninguru nunga bitarso; bare kari memek mu ko buruk kausik mel ningo nungumik te beteso ma se, wore ninguru nunga bita maguwuso.

¹¹Awiriya ko ali te kuting gege naguso, mu nu na inang mel terong la kapa tuso; bare awiriya ikia kawel karo karo bola pala lagara, mu nu kumik ikia ningo mena.

¹²Kari memek alo mu, lage memek te melmur gisan mu ninguru nongomang tusan; bare kari ningo diram mu, nunga ura kowar te mel yager beteso ale nunguning kapa nungarso.

¹³Kari memek mu kota ko munak memek giris palagoso ale taliposo; bare kari ningo diram mu ikup memek uwuta mu kia kaposo.

¹⁴Kari ko munak ningo te mel ningo ningo kumik kauso; se ura kowar bitar, mu koma yawara kapa kisokko.

¹⁵Kari supuling aora biya mu anapeya beteso mu ningo la ko iwita balso; bare kari sinar mu kiti guruga den ikiokko due sapa lagoso.

¹⁶Kari supuling aora biya mu pasak gomang magaruk se arikko; bare kari sinar mu bita maguwur, wore me pasak koma bitirukko.

¹⁷Den nunguning bala ko kari mu biguwura motam te den nunguning la balso; bare den kawel bala ko kari mu kawel gurugokko.

¹⁸Munak memek ngual kasik sapara mu batir iwita kari atumuso; bare kari sinar ko den welang mu kari gomang motam lilumuso.

¹⁹Den nunguning balu mu, tom maiya biya ani lagarukko; bare den kawel balu mu, tom tukunangta baga nungamili sapa namarukko.

²⁰Kariimet memek betemonko den kalosan, mu nongomang motam kawel karogo terong mam; bare kariimet bagara lila sokel tusan mu amilmilamonko.

²¹Kariimet ningo diram mu memek bo me nunga maguwuso; bare kariimet memek mu memek suen biya arigisan.

²²Yawe den kawel bala ko kariimet mu nunga biriruwuso; bare den nunguning bala ko kariimet mu nu nunga amilmiloso.

²³Kari sinar mu ko ikia ningo mu ninguru bitarso; bare kariimet ikia aora biya mu nunga kawel mu am ngual ngual balu sapasan.

²⁴Ura kowar betera ko kari mu kari supuling ko arataso; bare kari gagor mu diruwumon se ura dungan bitirukko.

²⁵Gemang namara taira bataga iluwa se nguangara mu kimik sokel karogo kaparukko; bare sangam den ningo mu gemang motam sokel tuokko.

²⁶Kari ningo diram mu ninguru ari ikiso ale asele bo ilak numi giso; bare kari memek nunga munan mu lage memek te nongorak namoso.

²⁷Kari gagor mu bulamurok bare mel bo me ta morukko; bare ura kowar betera ko kari mu mel ningo ningo giso.