Proverbs 11:8-19

⁸Kari ningo diram mu ikup kam ningi saonga taso; bare ikup mu geragoso kari memek mu maguwuso.

⁹Kaem ko me kuruwa ko kari mu, ko munak memek mu te ko saki alo nunga maguwuso; bare kari ningo diram mu ikia ningo te numi bataguru taso.

¹⁰Tom kariimet ningo diram mu mel betesan se ningo la arataso, mu wonong lilim la amilmilasan; se tom kariimet memek alo kua gilingisan, uwutatala kariimet aisan ale nuguting mosan.

¹¹Kariimet ningo nuam wonong bo te bagasan, mu wonong mu nup yawara taso; bare kariimet memek wonong bo te bagasan, mu nunga bala memek te wonong mu ko nup magoso.

¹²Awiriya ko bo doleng sapara den manarso mu nu kari ngualara; bare kari ikia nunguning ago mu uwuta me bitirukko.

¹³Munak gi ago geraga ko munan te den yumura pagorsan; bare kari gomang motam ko sinar taso, mu mel me bala ko mu me wetang te balso.

¹⁴Kari supuling alo wosagam me kiti guruguwomon, mu kariimet memek tamonko; bare kari supuling wosagam ninguru kiti guruguwomon, mu kariimet yawarakala bagamonko.

¹⁵Bo saonga ale ko dinau bo kote beteram umu kutuwura ko bala ni me baluko, mu awuk, ni keta nimi ikup ningi betesam; kari munan umu biriruwuso, mu nu ningo la lagoso.

¹⁶Imet gomang motam ningo se welang ago, mu kariimet nup biya tusan; bare kari darangara alis munumuning te mel ningo ningo giso, mu kumik nup mena.

¹⁷Kari gomang motam ningo se welang ago mu ningo la lagoso; bare ining singi alis daong ko kari mu ikup tagi kota kumik te beteso.

¹⁸Kari memek mu ko ura koma mel nunguning taso i maso, bare mena, ko ura koma mu dora se kawel; bare kari munan ningo diram bita lagoso, mu ko koma mel nunguning taso.

¹⁹Kari munan ningo diram ko sail tagiso, mu bagara ningo arigiso; bare kari munan memek karo tui lagoso, mu kua namara ko lage te namoso.