Proverbs 11:5-15

⁵Kariimet nungumik den mena alo mu, nunga munan ningo diram mu lage ningo nunga kasurso; bare kariimet memek mu nongota nunga memek nunga maguwuso.

⁶Diram la bagara ko kariimet alo mu, nunga munan ningo diram mu nunga sangaru taso; bare ikia suanta la me kaora alo mu, nunga ikia memek mu nunga taliposo.

⁷Tom kari memek bo kueso, mu mel taukko ko gomang ikia bita lagoso mu mena namoso; anapeya taukko ko sail tagi lagaram mu ta mena.

⁸Kari ningo diram mu ikup kam ningi saonga taso; bare ikup mu geragoso kari memek mu maguwuso.

⁹Kaem ko me kuruwa ko kari mu, ko munak memek mu te ko saki alo nunga maguwuso; bare kari ningo diram mu ikia ningo te numi bataguru taso.

¹⁰Tom kariimet ningo diram mu mel betesan se ningo la arataso, mu wonong lilim la amilmilasan; se tom kariimet memek alo kua gilingisan, uwutatala kariimet aisan ale nuguting mosan.

¹¹Kariimet ningo nuam wonong bo te bagasan, mu wonong mu nup yawara taso; bare kariimet memek wonong bo te bagasan, mu nunga bala memek te wonong mu ko nup magoso.

¹²Awiriya ko bo doleng sapara den manarso mu nu kari ngualara; bare kari ikia nunguning ago mu uwuta me bitirukko.

¹³Munak gi ago geraga ko munan te den yumura pagorsan; bare kari gomang motam ko sinar taso, mu mel me bala ko mu me wetang te balso.

¹⁴Kari supuling alo wosagam me kiti guruguwomon, mu kariimet memek tamonko; bare kari supuling wosagam ninguru kiti guruguwomon, mu kariimet yawarakala bagamonko.

¹⁵Bo saonga ale ko dinau bo kote beteram umu kutuwura ko bala ni me baluko, mu awuk, ni keta nimi ikup ningi betesam; kari munan umu biriruwuso, mu nu ningo la lagoso.