Proverbios 31:1-26

¹Rey-Lemuel-ibmarmar-sogsad. E-nana we-igargi Lemuel-odurdaksad:

²“Machi, ¿igi an bega ibmar sogsale? An-nukugi-dungued, ¿igi an be-unasale? Bab-Dummadse-ise-egislegaled-mimmi-gued, ¿igi na bega binsaed uksale?

³”Melle omeganbina surbinsa itogo. Bukidar reymar omeganse galakumaid.

⁴”Lemuel, reymar sisa-gobedi, igar-nuedsulid. Dule-dummagan-negdakmaidi mumguedi, igar-nuedsurbalid.

⁵Abakale, mumgudedgi, igar-maid iedmalale, dule-wilemaladgi bar binsasuli gudmalale.

⁶Bur be dulemar-burgwedanigus-maidga sisa uke, bur be dulemar-sae-itodiidga vino uke,

⁷adi, itoba na mumgumalagar, ibmar-abesa-gudiid, iemalagar, ise-wilegar-gudiidgi mer bar binsamalagar.

⁸”Dule-belagwadamalad-ular be sunmake, dule-sergan-sated-ibmar-ular be gwisgue.

⁹Wemar-ular be sunmake, igar-napiragwadba ega be igar itoge, dule-wilese-gudimalad be bendake. Dule-ibmar-nue-abesagudimalad be bendake.”

¹⁰Ome-innikigwadba-e-daed-oyogedi, ¿doa amioe? Ar akwa-nuegan-gargerbamaladba bur sunsogedid.

¹¹E-sui egi bensurdaed. E-omeba ibmar nikagudaed, ega ibmar galakusurdaed.

¹²Ome e-suiga, bane-bane ibidar-nuedga gued, ibmar-isganaga ega gusulid.

¹³Ome, lino-dub-baknaddaed, sibad-wawaad-e-absar baknaddabalid, na yeer-itogedba e-gonugargi morgi arbadaed.

¹⁴Igi-ur-dummagan-ibmar-ukedi, dikasuli-mas-sedanidae, debayobi, ome mas sedanidaed.

¹⁵Bolegoedba gwichiguardaed, masgi na e-mimmigan ogunnardaed, e-maimarga, neggi-ibmar-imaklegedi urmakdaed.

¹⁶Nainu-nued amidaed, geb nainu bakdaed, nainugi, uvaʼbi bipirmaknai imakdaed.

¹⁷Ome, arbaega, guagwar gunaidaed, gandikidba na surgan-minaidaed.

¹⁸Ome, e-ibmar-ukedi nueganbi nasgumaidaed. Mutikidbali, e-neggi gwallu-dummad akinsisulid, ar mutik-mutik arbasidaed.

¹⁹Argan-nailik mor-sobed-naku gani sidaed. Argan-baidsik, dub ebisidaed.

²⁰Ome, dule-wileged-bendakdaed, dule-ibmar-abesaagudiid-bendakdaed.

²¹Dambed-sibudik-sibudik batealile, e-mimmiganga bukib-binsadasulid. Ar bela e-mimmigan dambed-mor yoyoidbi damalad.

²²Ome na dukin, ubsan-mor-uki mor-baid makdaed, mor-suir-akwagiid yoidaed, lino-mor-sunsogmalad yoidabalid.

²³Dulemar bela neggweburgi e-sui mag-dakedbimalad. E-sui, ibmar-dummadga dummagan-abargi simogad.

²⁴Ome, lino-mor-nued-sobedi, saderba-mor-nagumalad-imakedi, dulemar-ibmar-ukmaladga manigi ukdaed.

²⁵Ome, innikigwadba gudidaed. E-nug dummarbaa gued. Ibmar-guoedga, bukib binsadasulid, ega alledaed.

²⁶Sunmakdele, binsaed-nikaa sunmakdedaed, dule-odurdakdele, sabekwaa dule-odurdakdaed.