PROVERBIOS 30:30-33

³⁰se león cati más tetic que sequinoc tapiyalme, yaya amo cholohua pampa amo teno quimajmatía;

³¹se cuapele cati tomahuac imetz, se oquich chivo, huan se hueyi tanahuatijquet quema quinyacana isoldados.

³²Sinta ica mohuihuiyo timohueyimajtoc huan timoyolilhuijtoc para tijchihuas cati amo cuali, xipinahua ica cati timoilhuijtoc huan xijtali momax ipan mocamac, amo xijchihua yon se tamanti cati amo cuali.

³³Sinta tijmanelos chicahuac nopa lechi, temachti tijchihuas mantequilla. Huan sinta tijtepachos chicahuac se masehuali iyacatzol, temachti quisas esti. Huan sinta tijcualancamacas seyoc, temachti anmotehuise.