Proverbios 30:2-33

²“Andi dulemarba bur bule ibmar-wissulid, akusunna an ibmar itoged.

³Binsaed-nikaguedi an durdaksasulid, Bab-Dummad-Isligwaledbela an akusunna itoged.

⁴”¿Doa nibnegse nakwiapi? ¿Doa nibneg-akar aidenoniki? ¿Doa e-argangi burwa gaoe? ¿Doa e-mor-dummadgi demar gaoe? ¿Doa napneg-naid-dikarmar omesisa? ¿Ar be wisi, doa we-ibmarmar-imaksa, degi, e-machi-nug be wisbali?

⁵”Bela Bab-Dummad-gayaburbagi bensuli guleged. Bab-Dummadi, sigu-abgaedyob dule-egi-bendakleged-amimalad-irwa gwisgued.

⁶Melle Bab-Dummad bega-sabsur-ibmar-sogega, degi, melle dule-gakansaedga be-imakbaliga, melle-e-gayaburbamar-maid be obulogo.

⁷”Bab-Dummadye, unnila ibmar-sogbo an bese egised. An burgwed-iduale, melle be anga imaksuli guo, be anga we-ibmar-sogbogwad imakedsego:

⁸Igar-isganagi, gakan-igargi, be an-ollor-imake. Melle dule-wilegedga, dule-mani-ibedga be an-imakbalo. Unnila ibmar-nue-abelemaladi be anga ukmai imako.

⁹Ar an mani-ibedga gudele, abakar na be-iealile, abakale an sokalile: ¿Ar doa wede Bab-Jehováʼye? Degine, an wiledibalile, abakar ibmar-atursaarbalile, degidbali, an be-nug-ichoge dakledagoed.

¹⁰”Melle mai-e-dummad-asabinni e-maigi ichakwa sunmako, adi, melle, we-mai be-ukabsaega, degidbali, be dummad-wilegoed.

¹¹”Ar gwen-gwena dulemar gadi-e-bab-ukabsadaed, degi, e-nangi ise-nued binsasurdabalid.

¹²Ar gwen-gwena dulemar san-swilidikye na bidamalad. Degi-inigwele, isguedginbi gudidamalad.

¹³Ar gwen-gwena nuga-nikamaladye na sogdidamalad, yamo bule-bule dulemarga gudidamalad.

¹⁴Gwen-gwena dulemar dule-wilemalad-wiogega, dule-ibmar-nue-abedimalad-wiogega, es-suidyobi, e-nugar-imaksa gudidamalad, estinyobi, e-akugar-imaksa gudidamalad.

¹⁵”Nus-abe-gobed, mimmigan warbo nikad, amala unnila weyob sokardamalad: ‘Udage, napi-udage.’ ”Ibmarmar geg wis-nubin-itodamaladi, sogbaa nikabalid. Ibmar-sogbakegwaddi, ‘gusye’ geg sogdaed.

¹⁶A-ibmarmar, wemalad: Burgwarmalad-meged-galu, napi-dule-burgwarmalad-abedaed. Ome-geg-mimmi-baked, mimmigan-abedaed. Napa diibina napi-sogdaed. Soo-duurmaksiid napi-sapan-abedaed.

¹⁷”Dule, urwakwaa e-bab-dakele, degi, e-nan-sogedba dasulile, sikwisichid e-ibe ibya-onosun, mula-non-ginnid, dula-gunsun.

¹⁸”Ibmar-sogbaagwad an geger itoged, ibmar-sogbakegwaddi, an nue-aku itoged.

¹⁹A-ibmarmar, wemalad: Mogir-billiba-sulubagi-nalla-naguedi, igi an magar itogoe. Akwasaila-dummadgi-naibe-nakwedi, igi an nabir magar itogoe. Demargi-ur-dummad-nadapir-geg-dogedi, igi an nabir magar itogoe. Degine, igi an magar itobaloe, dule abirgunagwar-gudii gubidaed.

²⁰”Ome, machered-dikarba-yoleged-e-daed weyobdo: Ome, machered-baid-ebo nog-gobdedaed, a-sorbali, na abalukdedaed. An neg-oakalossurye sogdedaed.

²¹”Dulemar-ibmar-abedasulid-sogbaa nikadi, napneg-wawanmaker saed. Sogbakegwaddi, napneg-giglimaker imaked.

²²A-ibmarmar, wemalad: Mai reyga megider, geger dakleged. Dule-binsaedsulid mani-ibedga-guder, geger dakleged.

²³Ome-galagwensuli-nanaed sui-nikuder, geger dakleged. Mai-ome e-dummad-omegi dummadga-guder, bur bule geger dakleged.

²⁴”Napneggi ibdurgan-burwigwad sogabake nikad, dule-binsaed-ibedbali bur binsaed-ibeganad.

²⁵A-ibdurgan wemardo: Iglimar, sorda-gandikidsurmaladid, degi-inigwele, yor-mosale, e-mas saboddamalad.

²⁶Nubimar, dogdar sorda nikasurmalad, degi-inigwele, akwa-ollogana-yaba e-gabedneg sobmalad.

²⁷Sesmar, e-idued satemalad, degi-inigwele, darekwaa nadapdamalad.

²⁸Asbanmar, baisursunna argangi galemalad, degite, reyneggi gudidamalad.

²⁹”Ibmar-sogbaa nikabalid, yeerdakle-gandikidba garmakdidaed. Sogbakegwaddi, gandikidba nanadidaed.

³⁰A-ibmarmar, wemalad: Achumigur-nono-wawaad, ibmar-durgan-bamaladba bur buledid, ibmar-abin sikirmaked satedaed.

³¹Gannir-machered, san-dummarbaa imakdidaed. Sibad-machered, e-bebe burwisur-dakledaed. Degine, rey, e-sorda-bila-onomalad-asabin e-ologurgin-sii nadapdaed.

³²”Dule-binsaedsuliyobi be san-odummosale, melle bar egi be binsao. Ibmar-isgana-imakedgi be binsas-gudiile, melle bar egi be binsao.

³³Dule, moli-nunis-eguredi, egi e-nunis-gwamakaled amied. Binnasur be asa-ogolele, bega abe ariodagoed. Be urwed-amiele, urwenai be gudoed.”