PROVERBIOS 30:12-31

¹²Inijuanti moitaj para tahuel cuajcualme huan para quichihuaj nochi cati tapajpactic, pero nelía itztoque soquiyojque iixpa TOTECO huan miyac inintajtacolhua.

¹³Nopa masehualme tahuel mohueyimatij huan motepanitaj hasta quinitaj sequinoc quej amo teno ininpati.

¹⁴Masehualme quej nopa quihuicaj machetas quej imiyaca totancochhua para ica quintzontamiltise teicneltzitzi. Quena, nochi cati teicneltzitzi huan cati amo teno quipiyaj quinequij quinmictise.

¹⁵Onca miyac tamanti quej nopa talcuitaxcoli cati quinequi tapijpiyas más mojmosta. Quena, nimitznextilis nahui tamanti cati amo quema tami ixhuij, huan amo quema quiijtohuaj: “Ya cuali”.

¹⁶Micta nochipa quinselía más mijcatzitzi. Se sihuat cati amo hueli conepiya, nochipa quinequi se conet. Huactoc tali nochipa quinequi más at, huan tit nochipa quitemohua más tamanti para quitatis.

¹⁷Cati quincualancaita o quinhuetzquilía itatahua, nopa tzojpilome huan cuatojme quiquixtilise iixteyolhua huan quincuase.

¹⁸Huan onca nahui tamanti cati na amo hueli nijmachilía, huan cati san nijtachilía:

¹⁹se cuatojti cati patani ipan ajacat, se cohuat cati mohuahuatatzti ipan huejhueyi tet, nopa barco cati yahui aixco ipan hueyi at cati huejcata, huan quenicatza se tacat mojmosta más quiicnelía nopa ichpocat cati quiixtoca.

²⁰Nojquiya amo hueli nijmachilía quenicatza se sihuat hueli quinamaca itacayo, huan teipa tacua huan motenpojpohua, huan quiijtohua: “Amo teno cati amo cuali nijchijtoc.”

²¹Huan itztoque nahui tamanti cati quichihuaj ma momajmatica masehualme, huan cati inijuanti quichihuaj amo hueli quiijyohuíaj:

²²se tequipanojquet cati mochihua se tanahuatijquet, se masehuali huihuitic cati quipiya nochi cati quinequi hasta mocahua cati iaxca huan nelmohueyimati,

²³se sihuat cati nochi quicualancaitaj huan teipa monamictía, huan se sihua tequipanojquet cati quicuilía ihuehue nopa sihuat cati quitequipanohuayaya.

²⁴Itztoque nahui piltapiyaltzitzi ipan taltipacti cati pisiltzitzi, pero tahuel talnamiquij hasta quinpanoj talnamiquini ica inintalnamijcayo.

²⁵Talnamiquij tzitzime pampa masque amo quipiyaj miyac chicahualisti, quisentilíaj inintacualis quema tatotoniya.

²⁶Talnamiquij cuatochime cati itztoque campa tet, pampa masque amo quipiyaj tetili, quichihuaj inintepasol campa tetzala.

²⁷Talnamiquij pilchapoltzitzi pampa masque amo quipiyaj inintayacanca, nejnemij nochi ica se pamit campa yahuij.

²⁸Talnamiquij nopa tocame pampa masque amo ohui para tiquitzquis ica momax, itztoque campa hueli hasta ipan itequical se tanahuatijquet.

²⁹Itztoque nahui tamanti cati nelía mosemacaj huan monemiltíaj quej se hueyi tanahuatijquet:

³⁰se león cati más tetic que sequinoc tapiyalme, yaya amo cholohua pampa amo teno quimajmatía;

³¹se cuapele cati tomahuac imetz, se oquich chivo, huan se hueyi tanahuatijquet quema quinyacana isoldados.