Proverbios 27:7-18

⁷Sacsasha carga abëjapa mishquintapis melanäcunmi. Yargaycajpämi ichanga ashgaj micuypis mishquin.

⁸Yurishan marcanta cachaycur puricachaj runaga caycan pichiusa gueshwanta cachaycur maypapis puricojnömi.

⁹Cuyayllapaj perfümiwan pichucuriptenga shongupis cushicurinmi. Amïgun allita willapaptenga shongunpis achicyärinmi.

¹⁰Amïguyquitaga imaypis ama gongaychu. Papäniquipa amïguntapis ama gongaychu. Inrïducho cashayqui öraga wauguiquipa wasinman ama aywanquichu. Carucho tiyacoj wauguipitaga bisïnu amïguyquimi mas alli.

¹¹Ïju, musyaj yachaj cay. Chauraga fiyupami cushicushaj. Chaynöpami manacajman churamajcunatapis cutichishaj.

¹²Alli tantiyacoj runaga mana alliman chayananpaj cajta musyar witicunmi. Mana tantiyacoj runami ichanga imatapis mana cäsupaypa aywar chayan fiyupa ñacayman.

¹³Jäpa runata garantiyajtaga asta röpantapis guechuy. Jäpa warmita garantiyajpatapis rindata chariy asta päganancama.

¹⁴Chaca-chacalla amïguta sinchi gayaraypa saludaypis manami allichu. Paypäga chayno saludashan caycan gayapashan-japuymi.

¹⁵Shimisapa warmipis tamyaptin mana chawaypa jutoj wasinömi achäquita ashipayta mana jamanchu.

¹⁶Upällachiyta munarpis manami camäpacunchu. Wayrata chapaycaj-japuymi, maqui-paltancho asëtita chariycaj-japuymi upällachiyta mana camäpacunchu.

¹⁷Fyërrutaga fyërru-masinwanmi afilan. Chaynömi runapis jucwan parlar masta yachacun.

¹⁸Ïgusta alli cuydäga poguptin wayuynintapis micongami. Patrunninta alli atindejpis alli rispitashami canga.