Proverbios 25:2-26

²Pipis mana musyashan cajtaga Tayta Diosllami musyan. Chaypitami paytaga rispitan. Rayga llapantami musyayta munan. Chaypitami paypis rispitasha caycan.

³Ima altucho syëlu cashantapis, may ruri cay pacha cashantapis manami pipis ricanmanchu. Raycuna yarpashantapis manami pipis musyanmanchu.

⁴Guellaypa ganrancunata jorgunayquipaj chulluchiyraj. Chauraga cuyayllapaj cöpatami guellay tacäga ruranga.

⁵Chayno, mana alli runatapis rayta yanapaycashanpita jitariy. Chaura ray mandashanchöga llapanpis rasun cajta, alli cajllatami ruranga.

⁶Raypa ñaupancho cashpayqui ama alli-tucuychu. Mayur rispitädu runacuna jamaränanmanpis ama jamaychu.

⁷Chaypa ruquenga mas alli canman quiquinraj «cayman jamacuy» nishuptiquimi. Mana gayaycäshuptiqui quiquillayquipita aywaptiquega pengaypämi gargushunquipaj. Imatapis ruraycajta ricashpayqui

⁸jucllaga ama dimandaj aywanquichu. Runa-masiqui «manami chaynöchu» nishuptiquega gam pengaychömi quëdanquipaj.

⁹Chaymi rimëruga runa-masiquiwanraj parlay. Jucpa washantaga ama willacuychu.

¹⁰Washan rimaycajta pipis wiyarga pengaymanmi churashunquipaj. Pengayman churashuptiquega cutiricuyta mananami camäpacunquipänachu.

¹¹Camacashan öra rimashanga allimi. Gori mansänano sumaj allimi caycan.

¹²Wiyacoj runapäga yachaj runa piñacushan caycan gori surtïjano gori wallganömi.

¹³Alli cachaga cachajpaj caycan usya quillacho allpa shanshaycaptin tamyarcojnömi. Mandajninta alli cushicachin.

¹⁴Imatapis gonanpaj aunircur mana cumlëga caycan chaqui pucutay lätaycachaycajta wayra gargurejnöllami.

¹⁵Pasinsacojcunaga fiyupa ollguycajtapis gasarpachinmi. Alli shimillanpa parlarga mandaj rabyaycajtapis allchacächinmi.

¹⁶Abëjapa mishquinta tarerga ama yamacashayquicamaga micunquichu. Alläpa micorga melanar gumitananquimanmi.

¹⁷Amïguyquiman chayarga ama cutilla cutinquichu. Alläpa chayaptiquega yamacäshunquipämi. Chiquipaytanami gallaycushunquiman.

¹⁸Llullacur runa-masinpa contran rimäga mana alli runami. Chay-niraj runaga mäsunömi, espädanömi, llauchi-punta lëchanömi malubracun.

¹⁹Llaquicuy cashan öra mana cumlej runaman yäracöga chaquin paquicusha puriycajnömi, uchcu quirun nanaycaptin chucru micuyta micuycajnömi.

²⁰Llaquicuycaj runata birsuparga ruraycan gueriman limunta gapchipaycajnömi, fiyupa gasaycho caycaptin röpanta lojticaycächejnömi.

²¹Chiquishojniqui yargaycaptenga garaycuy. Yacunaptinpis yacuta macyay.

²²Chayno ruraptiquega pengacuyllawanmi cäranpis pucayacäconga. Chayno rurashayquipita Tayta Diosnami pägashunquipaj.

²³Norte caj-läpita wayra wayrämuptinmi tamya chayamun. Runapa fiyu shiminpitami jagayächinacur chiquinacuypis chayamun.

²⁴Alli jatun wasicho rimanacuyllata pillyallata ashiycaj warmiwan goyänanpa ruquenga mas allimi canman japallan chucllallacho tiyacuptinmi.

²⁵Carupita alli willapata chayachimushanga caycan yacunaywan wañuycaptin ïlaj yacu shongunman chayarcojnörämi.

²⁶Alli runa juchayoj runacunawan tallucashanga caycan chuya yacuwan putca yacu tallucashannömi.