Proverbios 23:6-18

⁶Micha yargaj runacunapa wasinman ama yaycunquichu. Mishqui micuynincunatapis ama munapaychu.

⁷Chay runaga micuy aycalla cuestashantapis cuentata jorguycanmi. Janan shongullami «micushun, upushun» nishunqui.

⁸Nircorga micushayquitapis gumitanquipämi. Cuyachicur alli shimillayquipa parlashayquipis yangami canga.

⁹Mana tantiyacojcunataga ama willapaychu. Yachaj cayniquiwan allita willapaptiquipis asipäshunquipämi.

¹⁰Unaypita-pacha jawiraj lindacunataga ama witichinquichu. Wacchacunapa chacranmanpis guechunayquipaj ama yaycunquichu.

¹¹Paycunata Washäga caycan fiyupa munayniyojmi. Pï ñacachiptinpis Paymi faburnin jatarir castiganga ñacachejtaga.

¹²Yachachishushayquicunata llapan shonguyquipa yachacuy. Yachaj canayquipaj willapäshushayquitaga yarparay.

¹³Wamrataga piñacuypaj captenga simri piñacuy. Ishcay quimsa maqui astishallayquega manami wañuchengachu.

¹⁴Astishayquiwanga mana alliman chayar pirdicänanpitami salbaycanqui.

¹⁵Ïju, gam sumaj yachaj cayman chayaptiqui nogaga fiyupami cushicushaj.

¹⁶Rasunpa alli cajcunallata parlajta wiyaptë shongöpis fiyupami cushiconga.

¹⁷Juchasapacuna imatapis charajta ricar ama rabyapaychu. Chaypa ruquenga imaypis Tayta Diosllata manchapacuy.

¹⁸Chayno goyarga alli cawaymanmi chayanquipaj. Yarpashayquicunapis manami yangallapächu canga.