Proverbios 1:5-27

⁵Dule-binsaed-ibedi, dule-nue-ibmar-wisidi, we-binsaed-nued itodaed, adi, gatik binsaed-nikaa guega, egi durdakbaligar.

⁶Adi, binsaed-nuegan magar-itogega, e-burbagan-mamaid magar-itogega, dule-binsaed-nikaa-e-ibmar-soged magar itogega, oegedgi-sunmakleged magar-itobaligar.

⁷Binsaed-nikaguedi, Bab-Jehová-dobee-nanaedgi danikid. Dule-binsaedsurmaladi, binsaed-nikagued abesulid, binsaed-nueganba nanabisulid.

⁸Machi, be-bab-be-unaed nue be itogo. Be-nan-be-odurdakedba be dao.

⁹Be-ibmar-durdaksad bega orgurginyobi ibnuedga guoed, bega ordubyobi ibnuedga guoed.

¹⁰Machi, dule-isganamar be-yardakbi-gualile, melle ese binsaed galego.

¹¹Bega sokarmalale: “Anmarba be dage. Anmar dule-ibmar-oakalossulid oburgwenae. Anmar binsa-nabir-itogedba dule-baisur-binsadiid oburgwenae.

¹²Igi napa dule-burgwaled-doe, deyob, anmar dule-neg-oakalossulid oburgwenamoga.

¹³Anmar ibmar-nuegan ichesuli sumaloed. Anmar ibmar-sumaloedi, anmar-neggi ichesuli urbemaloed.

¹⁴Anmarba be akae. Anmar ibmar-suoedi, anmar bega ukmogoed.”

¹⁵Machi, melle amarba be akao, amar-igar-isganagi be banguo.

¹⁶Ar we-dule-isganamar, ibmar-isgana bur gwae imakbidamalad, gwae dule-oburgwebidamalad.

¹⁷Ar sikwimar e-wagab e-gaedsinai daksale, egi gwen dogosulid.

¹⁸Ar we-dule-isganamardi, na dukin yardakledimalad, emar na dukin oburgwedimalad.

¹⁹Dulemar-dogdar-maniginbi-binsamalad, deyob gunonidamalad. Dulemar-dogdar-maniginbi-binsamalad, dule-baidse burgwenonidamogad.

²⁰Binsaed-Nikaguedi, binnasuli galimbaba goled, dulemar-bukidar-ambikued-abargi isseed sunmaked.

²¹Binsaed-Nikaguedi, dulemar-igar-itoged-abargi sunmaked, neggweburse-doged-yawagakgi sunmaked. Weyob soged:

²²“Sapingan, bemar-amba-nue-ibmar-wissurmalad, ¿ar sanagwadse, ibmar-wissuli be gudii gumaloe? ¿Ar sanagwadse, be dulemargi-dododiid, bar dulemargi dodosuli gumaloe? Dule-binsaed-satemalad, bemar, ¿sanagwadse ibmar-wisigued-isdar-daked sae be dakmalode?

²³¡An-ibmar-sabsur-soged be itomala! An-burba-nued an bega unnitiba ukoed. An-binsaed-wisguega an be-imakoed.

²⁴An bese gochamar-inigwele, yapa be an-itogusmalad. An bese achasmar-inigwele, gwen be amba ibsassurmalad.

²⁵Binsaed-nuegan-an-bega-uknaigusmaladi, aka be obachamalad. An-sabsur-bega-ibmar-sogsadi, gwen be itossurmalad.

²⁶A-ulale, bemar sabsur-odurdaklealile, an bemarga binnasuli alloed. Bemargi dobed nagunonikile, an bemarga alloed.

²⁷Burwa-dummad-goledyob bemargi dobed nagunonikile, an bemarga alloed. Burwa-ololedyobi bemargi nunmak-itoleged-dummad nagunonikile, an bemarga alloed.