Proverbios 19:3-29

³Dule-binsaedsulidaedi, e-binsaedsulidba yogasaar nanaddaed. Geb sogdedaed: “An-akargusadi, Bab-Jehováʼginye.”

⁴Dule, ibmar-nuegan-nikadba bukidar aimar-nikuega gued. Ar dule-wilegeddi, na e-aise-bakale, egi bangued.

⁵Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansili na gwen san-onogosulid.

⁶Dulemar-bukidar, dule-obinebak-ibmar-uked-e-aiga-guega amimalad. Bela dulemar, dule-ibmar-binsa-uked-e-aiga gumalad.

⁷Ar bela dule-wileged-e-gwenadgan, dule-wileged-isdar-dakele, e-aimar-bursunna, bur bule isdar dakoed. Dule-wilegedi, na e-bendakega e-aimar-amidiguo-inigwele, bipisaar amiosulid.

⁸Dule ibmar-magar-itoged-amiedi, na e-san sabed. Na ibmar-durdaksad imakele, ibmar-nued amioed.

⁹Dule-ibmar-daksad-gakansaar-sogedi, sabsur-odurdaklegosuli guosulid. Dule-gakansaar-sunmakedi, na burgwed-amioed.

¹⁰Dule-binsaedsulidaedi, ibmar-mani-gargerbad-nikuedi, egi nosulid. Dule-maiga-gudiid-bursunna, bur bule dule-dummagan-e-dummadga-guedi egi nosulid.

¹¹Dule-binsaed-nikadaedi, na urwed wisi bargaed. Dule-egi-nosad-egi-nossuliyob-dakeddi, e-nug dummarbaa imaked.

¹²Rey-urwedi, achumigur-nono-wawaad-uurmakedyob gued. Ar rey-e-nued-binsaeddi, gagangi boo-bateyobi neg-imaked.

¹³Machi-binsaedsulidaedi, na e-bab-wile-itogega imaked. Ome-e-ulus-ulusdaedi, dii-yakedyob gued, binna-binna sui-wioged.

¹⁴Nega, degi, ibmar-nuegan, babgan uked. Ome-binsaed-nikadaeddi, Bab-Jehová uked.

¹⁵Wieguedi, dulega gabed-uked. Dule-wiegala ukudmaada gudii guoed.

¹⁶Dule-Bab-Dummad-Igar-Maidba-ibsaedi, dukin san-bendaked. Dule-Bab-Jehová-Igar-Mesisad-isdar-dakeddi, burgoed.

¹⁷Dule-wilegedga-ibmar-ukedi, Bab-Jehováʼga-ibmar-uknaiyob gued. Bab-Jehová dule-ibmar-uksadga gannar ibmar uked.

¹⁸Be-machi nued-nanaegala, bipigwadgi be unao. Be sabsur-odurdakalile, melle oburgwedse be imako.

¹⁹Dule-gadi-urwedi, sabsur-odurdaklegoed. E-urwed-bargaega egi binsa alamakleged, aka bur bule uluddaed.

²⁰Bega-binsaed-uklegedi, be itoge. Be-unaedi mer be isdar-itoge, ar dule-binsaed-ibedga be guoed.

²¹Dule ibmar-imakega bukidar igar-amied, degi-inigwele, Bab-Jehová-ibmar-imakbiedbi imakleged.

²²Dule emar-innikii-eba-daed abeged. Dule-gakansiliba, bur nuedid, dule-wilegedga-gued.

²³Bab-Jehová-dobekwaa-nanaedi, dula-gudii dule-imaked. Bogidik-gudii dule-imaked, mer-bonigan-nikuega dule-imaked.

²⁴Dule-wiegala mas-gunnega bateyagi e-argan ododaenad, degi-inigwele, wiedba e-gayaba mas odosulid.

²⁵Dule-binsaedsulidaedi, unnila sabsur-odurdakedgi ibmar-durdaked. Dule-binsaed-nikagueddi, na ibmar-durdakega irgwen-ounaed abeged.

²⁶Dule e-bab-ibe-ibmar-atursaedi, neggi e-nan-ononnobalidi, a-dule, machi-isganad, dule-binged-satedid.

²⁷Machi, dule-be-unaed be itosulile, binsaed-nikaguedgi be bangudoed.

²⁸Dule-ibmar-daksad-gakansaar-soged igar-nabolenaidgi dodoged. Dule-isgana ibmar-isganaginbi sunmaked.

²⁹Dule-emargi-dododimaladga sabsur-odurdakleged-igar guagwar maid. Dule-binsaedsulidaedga bibyoleged-igar guagwar maimogad.