Proverbios 19:2-27

²Mana yarpachacuyllapa imatapis juclla rurashaga manami allichu. Mana yarpachacuyllapa imatapis rurarga pantanmi.

³Mana tantiyaj runaga upa cayninwanmi llutanta ruran. Nircorga Tayta Diostana jitapan.

⁴Ima-aycanpis bastanti captinmi rïcupaga pï-maypis amïgullan. Pobritami ichanga amïguncunapis gongaycärin.

⁵Alman ranticojcunaga castïguchömi canga. Llullacunapis castïguchömi canga.

⁶Achcajmi rïcupa maquintaga rispitar muchan. Tarichicojtapis llapanmi ashin amïgun cananpaj.

⁷Pobritaga famillyancunapis manacajmanmi churan. Chayno caycaptenga rasuntachari amïguncunapis mana witipannachu. Amïgupayta ashiptinpis pacacaycärinmi.

⁸Runaga alli cawayta munar allimi yachacun. Yachacushanno rurarga alli cajllatami ruran.

⁹Alman ranticojcunaga castïguchömi canga. Llullacunatapis wañuymi shuyaraycan.

¹⁰Yarpayniynaj mana tantiyäga yangami mishti-tucunpis. Uyway runacunapis manami mayur runacunapa mandajnin canmanchu.

¹¹Yarpaysapa runaga imapitapis pasinsacunmi. Achäquita ashipajcunatapis perdunanmi.

¹²Ray ollgorga liyunno manchacuypämi. Ray cushisha captenga guewaman shullay chayajnömi.

¹³Mana tantiyacoj wamraga taytanta llaquicachinmi. Shimisapa warmipis mana chawaypa jutoj wasinömi achäquita ashipayta mana jamanchu.

¹⁴Mamapita taytapitami wasita chacrata chasquin. Alli yarpayniyoj warmitanami Tayta Diospita chasquin.

¹⁵Guellaga guellanaywanmi puñuyllacho cacun. Chaymi guella runaga imaypis yargayllacho canga.

¹⁶Mandamintuta cumlejcunaga alli cawaytami tarenga. Yachachishanta manacajman churajmi ichanga wañuyta tarenga.

¹⁷Pobrita yanapäga Tayta Diostami ristaycan. Chayno yanapashanpitaga quiquin Tayta Diosmi cutichenga.

¹⁸Wamrayquitaga tacsha cashancama piñacur astiy. Ichanga cuydä castigaycällar wañuycachinquiman.

¹⁹Juclla rabyacäcöga castigashami canga. Ñacaycajta salbarga chaynöllami yaparir-yaparir salbaycanga.

²⁰Willapäshushayquita wiyacuy. Piñacushushayquitapis chasquicuy. Chayno car-rämi yachaj canquipaj.

²¹Runaga ima-aycata ruraytapis yarpanmi. Chaypis Tayta Dios camacächishan cajllami camacan.

²²Runataga nishanta cumlej alli canantami pipis munan. Trampösu cananpa ruquenga pobrilla cacuptinpis mas allimi.

²³Tayta Diosta rispitar manchacoj cäga alli cawaytami tarin. Chaynöpami alli goyan. Manami imamanpis chayanchu.

²⁴Guella runaga lätun churapacusha caycarpis manami ni micunallanpäpis chagarcunchu.

²⁵Shimisapa runata castigaptinmi mana tantiyacöga yachacun. Alli tantiyacoj yachaj runami ichanga juc willapayllacho yachacun.

²⁶Taytanta magaj runaga fiyupa jamurpaypaj gueshyami. Mamanta wasinpita gargoj runaga fiyupa melanaypämi.

²⁷Ïju, llapan corrijishushayquita wiyacuy. Mana wiyacorga llutan caminupami purinquipaj.