Proverbios 17:11-24

¹¹Mana wiyacöga imay örapis pillyallatami ashiycan. Chayno cashanpitami mana cuyapaypa ñacachicoj runawan tinconga.

¹²Mana tantiyacoj upa runa imata rurananpäpis yarparaycajwan tincunanchïpa ruquenga mas allimi canman wawanta suwapaycuptin fiyupa rabyasha caycaj ösuwan tincushapis.

¹³Alli yanapaycaptin mana alliwan cutichejpa wasinchöga manami imaypis mana alli goyay pishengachu.

¹⁴Rimanacuyman chayayga lloglla shamojpitapis mas piyurmi. Rimanacuyman chayanayquipa ruquenga witicuy.

¹⁵Juchan musyacaycaptin mana castigajtapis, juchaynajta «juchayojmi» nejtapis ishcantami Tayta Diosga melanäcun.

¹⁶¿Imanirtaj mana tantiyaj runacunaga yachayta rantinanpaj guellaynin aptacurcur shamun? Imatapis manami tantiyanchu.

¹⁷Alli amïguga manami cachaycushunquichu. Llaquicuycunacho captiquipis payga wauguiquinömi.

¹⁸Mana tantiyaj upacunaga pitapis garantiyanmi. ¿Imanirtaj jucpa jagancunata pägapacunquiman?

¹⁹Rimanacoj yachacashaga imaypis pillyallatami ashiycan. Alabacojcunaga quiquillanmi mana alliman chayan.

²⁰Mana allita yarpäga manami imaypis allitaga tarengachu. Shimisapaga shimillanpitami mana alliman chayanga.

²¹Wamran mana tantiyacoj captin taytanga fiyupa llaquicuyllachömi goyan. Mana tantiyacoj upapa taytanga imaypis manami cushisha goyanchu.

²²Cushishalla goyajcunaga sänumi cawan. Llaquishalla goyajcunapami ichanga gänasnin imapäpis mana canchu.

²³Fiyu runaga pacayllapami saynishantapis chasquin alli cajta mana alli arreglananpaj.

²⁴Yarpaysapa runaga mas yachaj caytami munan. Mana tantiyacojmi ichanga imata munashantapis mana musyanchu.